Ivanov mund të ndërrojë mendje – Analisti: Kriza politike në Maqedoni po kthehet në krizë kushtetuese
Presidenti i Maqedonisë Gjorge Ivanov mund të rimendojë vendimin e tij për refuzimin e dhënies së mandatit për formimin e qeverisë Zoran Zaev.
Një ndryshim në pozicionimin e Ivanov mund të ndodhë në ditën në vijim sipas analistit politik Andreja Stojkovski. Në një intervistë për SeeNews, Stojkovski, i cili është edhe president i qendrës për strategjitë europiane në Shkup “Eurothink”, u shpreh:
“Presidenti Ivanov ka dalë kundër kushtetutës në shumë raste. Në fillim ai ia dha mandatin një kandidati nga një parti e cila nuk ka shumicën në kuvend, ndërsa më vonë ai refuzoi t’ia jepte mandatin kandidatit nga mazhoranca e re”.
Analisti thotë se kushtetuta e vendit nuk i jep të drejtën presidentit të zgjedhë se cili duhet të qeverisë, apo të vendosë kushte për formimin e saj; por kushtetuta e detyron atë t’ia japë mandatin kandidatit që gëzon mbështetjen e shumicën parlamentare.
Sipas Stojkovskit, ky konflikt ka një impakt negativ për vendin dhe kriza politike është shndërruar në një krizë kushtetuese.
Duke folur për mundësinë e zgjedhjeve të reja parlamentare, ai shprehet:
“Rezultatet e dy partive të mëdha në votimin e dhjetorit ishin shumë të afërta. Zgjedhjet e reja thjesht do t’i përsërisnin këto rezultate”.
Më herët gjatë javës, Sekretari i Përgjithshëm i OSBE-së Lamberto Zannier shprehu shqetësimin e tij për situatën politike aktuale dhe nxiti liderët maqedonas t’i japin fund kësaj krize të zgjatur për të mirën e qytetarëve.
Sipas Zannier, rezultati i zgjedhjeve të monitoruara nga BE kanë një bazë të fortë për krijimin e një qeverie. Ai i kërkoi përmes një deklarate për shtyp parlamentit maqedonas të fillojë të punojë në linjë me parimet demokratike dhe në përputhje me ligjin.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.