Izraeli dhe Qipro, në dakordësi për gazin. Arrijnë marrëveshje për fushën Afërdita, që kalon kufijtë detarë
Izraeli dhe Qipro kanë rënë në një dakordësi mbi rezervat e gazit që shtrihen në kufijtë e tyre detarë, sipas ministrisë së energjisë në Qipro, ç’ka përbën një hap të rëndësishëm në zgjidhjen e një konflikti 9 vjeçar. Zhvillimet tek fusha e gazit Afërdita në ujërat e Qipros janë ndaluar për shkak se një pjesë e vogël shtrihet në zonë detare të Izraelit. Fusha në Qipro u zbulua në vitin 2011. Ministrja qipriote e energjisë, Natasa Pilides, tha se ajo dhe homologu izraelit, Yuval Steinitz, kanë rënë dakord mbi një rrjet për të zgjidhur çështjen dhe udhëzimet do kalohen tek kompanitë e përfshira në projekt.
“Rrjeti do të caktohet në një letër të përbashkët që po përgatitet. Të dyja palët jemi të kënaqura pas 9 vitesh të diskutimeve”- tha ajo. Homologu izraelit, Steinitz, tha se ka shanse të një zgjidhjeje graduale. “Asgjë nuk është e qartë, por ekziston një shans i mirë që kjo të sjellë në një zgjidhje përfundimtare të kësaj pengese ndaj marrëdhënieve të mrekullueshme mes Qipros dhe Izraelit” – tha Steinitz.
Qipro nënshkroi në vitin 2019 një koncesion 25-vjeçar me Nobel Energy, Shell dhe Delek Drilling, për shfrytëzimin e fushës Afërdita. Izraeli ka thënë se duhet një marrëveshje përpara se të nisin punimet, për shkak se Afërdita shtrihet në anën izraelite. Fusha e gazit Afërdita vlerësohet se mban 116 miliardë metra kub gaz. Dakordësia bën fjalë për 10% të depozitës, që është një pjesë e gazit të zbuluar më parë në Izrael.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.