Izraeli ka vaksinuar mbi 15% të popullsisë! Ka paguar dyfishin e çmimit për dozë dhe i ka ripaketuar në kuti të vogla
Izraeli është vendi i parë në botë në programin e vaksinimit të Covid-19, pasi ka injektuar thuajse 15% të popullsisë së vendit prej 9.3 milionë në vetëm 2 Javë. Vendi ka porositur vaksinat më herët, ka paguar më shumë, ka dixhitalizuar shpërndarjen dhe zgjeruar furnizimin. Vendimi i parë i rëndësishëm ishte pagesa më e lartë për të marrë vaksinat më herët. Zyrtarët kanë bërë të ditur për Reuters se Qeveria e Kryeministrit Benhamin Netanyahu ka paguar rreth 30 dollarë për vaksinë, apo thuajse dyfishin e çmimit në qarkullim. Pfizer ka deklaruar se ka përdorur një formulë të vendosjes së çmimeve me nivele, bazuar tek volume dhe datat e dërgesave. Izraeli i ka premtuar gjithashtu kompanisë një shpërndarje të shpejtë, që do shërbejë si shembull për vende të tjera. Ministri i shëndetësisë Yuli Edelstein, ka thënë se çlirimi i ekonomisë së Izraelit nga karantina, ka justifikuar çmimin më të lartë të vaksinave.
“I kemi thënë Pfizer dhe Moderna se nëse jemi një nga vendet e para që nisim vaksinimin, shumë shpejtë këto kompani do shohin rezultatet”- tha ai. Izraeli ka lajmëruar në Nëntor marrëveshje me Pfizer dhe dërgesat e para kanë mbërritur më 9 Dhjetor. Ekipet në vend kanë ripaketuar paletat e mëdha të ngrira në kuti të izoluara në përmasën e një pice, ç’ka ka mundësuar shpërndarjen në numra më të vegjël në zona të largëta.
Vaksinat po shpërndahen nga një njësi e logjistikës e kompanisë së farmaceutikës Teva në vend, në një fabrikë nëntokë pranë aeroportit kryesor të Izraelit. Tridhjetë frigoriferë gjigantë me temperaturë -70 gradë Celcius, mund të mbajnë deri në 5 milionë doza. Kompania e logjistikës i ripaketoi në kuti për 100 doza të dërgohen në 400 qendra të vaksinës.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.