Ja afati i ri përfundimtar për titujt e pronësisë mbi tokat bujqësore – Qeveria propozon 31 Korrikun 2018
Këshilli i Ministrave ka propozuar shtyrjen e afateve për përfundimin e procesit të plotësimit të titujve të pronësisë mbi tokat bujqësore, në territoret e ish-kooperativave bujqësore.
Afati i vendosur në projektligjin e qeverisë është data 31 Korrik 2018, duke e shtyrë në këtë mënyrë me 6 muaj të tjera vlefshmërinë e këtij procesi, nga data 31 Dhjetor 2017, që përcaktohet aktualisht në ligjin e ndryshuar në mes të vitit 2016.
Pengesë për realizimin e këtij afati brenda kushteve të caktuara kohore duket se janë bërë ngarkesat e institucioneve të përfshira në proces.
Sipas përllogaritjeve të drejtores së Komisionit për Verifikimin e Titujve të Pronësisë, numri i familjeve që nuk kanë titull pronësie, pavarësisht se përdorin sipërfaqe toke është shumë më i madh se numri i atyre që kanë përfituar.
Në prezantimin e programit të 100 ditëve të para të qeverisjes, kryeministri Edi Rama paralajmëroi edhe një reformë në fushën e hipotekave me krijimin e Agjencisë Kombëtare të Titujve të Pronësisë. Ngritja e këtij institucioni premton një shërbim më të shpejtë për qytetarët dhe një praktikë të re pune, ku do të jetë agjencia e cila do të bëjë një regjistrim të përgjithshëm të titujve.
Shtyrja e afatit ishte paralajmëruar edhe nga Ministri i Bujqësisë Niko Peleshi, i cili tha se do të ngrihet një grup i posaçëm pune që do të merret vetëm me trajtimin e pronave, në mënyrë që pajisja me titull pronësie të përfundojë brenda 300 ditëve të para. Sipas tij ky afat i ri do të jetë shansi i fundit për fermerët, pasi nuk do të ketë më shtyrje të tjera.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.