Ja çfarë vendosën udhëheqësit e G7, lidhur me zjarret në Amazon!
Udhëheqësit ndërkombëtarë, që u mblodhën në samitin e G7 thuhet se janë afër një marrëveshjeje për të ndihmuar situatën e rëndë, në të cilën ndodhet Amazon, për shkak të zjarreve që kanë rënë. Presidenti francez Emmanuel Macron tha të dielën se një marrëveshje për të siguruar “ndihmë teknike dhe financiare” ishte afër.
Kritikët kanë akuzuar Presidentin e Brazilit, Jair Bolsonaro, për shkatërrimin e Amazon përmes retorikës anti-mjedisore dhe mungesës së veprimeve për shkeljet e shpyllëzimit. Ashpërsia e zjarreve dhe reagimi i qeverisë së tij, kanë shkaktuar protesta jo vetëm lokale por dhe protesta globale.
Presidenti Macron javën e kaluar i përshkroi zjarret si një “krizë ndërkombëtare” dhe nxiti që atyre t’u jepeshin përparësi në samitin e G7 gjatë fundjavës. Ai është shprehur se,
”Udhëheqësit janë të gjithë dakord për të ndihmuar ato vende që janë goditur nga zjarret sa më shpejtë që të jetë e mundur. Ekipet tona po kontaktojnë me të gjitha vendet e Amazon, kështu që ne mund të përfundojmë disa angazhime shumë konkrete që përfshijnë burime teknike dhe fonde.”
Kryeministri i Mbretërisë së Bashkuar Boris Johnson tha se Britania do të sigurojë 10 milion paund për të mbrojtur pyjet e Amazon.
Por çfarë është duke bërë Brazili lidhur me këtë situatë?
Të Premten, duke u përballur me presionin në rritje nga jashtë, Presidenti Bolsonaro autorizoi ushtrinë të ndihmojë në zgjidhjen e flakëve. Ministria e Mbrojtjes ka thënë se 44,000 trupa janë në dispozicion si dhe ndërhyrja ushtarake është autorizuar në shtatë shtete. Aeroplanët e luftës gjithashtu janë vënë në dispozicion për të hedhur ujë në zonat e prekura.
Presidenti brazilian, ka deklaruar se ka pranuar gjithashtu një ofertë mbështetjeje nga kryeministri izraelit, Benjamin Netanyahu, dhe pse ka qenë kritik, kohë më parë, ndaj përgjigjes së qeverive të huaja dhe i ka akuzuar ata për ndërhyrje në sovranitetin kombëtar të Brazilit.
Duke njoftuar ndihmën ushtarake në një deklaratë mediatike, presidenti Bolsonaro këmbënguli se zjarret pyjorë “ekzistojnë në të gjithë botën” dhe tha se “nuk mund të shërbejnë si pretekst për sanksione të mundshme ndërkombëtare”.
Ndërkohë presidenti i Këshillit të BE-së Donald Tusk pranoi se ishte e vështirë të imagjinohej që bllokimi të ratifikonte marrëveshjen e shumëpritur, një marrëveshje tregtie me vendet e Amerikës së Jugut, ndërsa Brazili ende nuk po arrin të frenojë flakët. Ndërsa kritikat u ngritën përsëri javën e kaluar, Ministri i Financave i Finlandës shkoi aq larg sa kërkoi që BE të konsiderojë ndalimin total të importeve të viçit brazilian.
Elefteria Zguri/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.