Janar 2018, Peleshi: Shpallim skemën e re të mbështetjes financiare në bujqësi
Sektori i bujqësisë do të ketë mundësi të përfitojë nga subvencionet e qeverisë që në fillim të vitit të ardhshëm. Ministri i Bujqësisë Niko Peleshi, gjatë një vizite në Maminas në Durrës, deklaroi se që në janar të vitit të ardhshëm “ne do të shpallin skemën e mbështetjes financiare për bujqësinë”. Sipas Peleshit bujqësia organike do të jetë një nga fushat që do të marri grante të posaçme.
“Në vitin që vjen, herët në janar, të vitit të ardhshëm, ne do të shpallin skemën e mbështetjes financiare për bujqësinë. Këtë vit është më e madhja, që ka patur ndonjëherë Shqipëria, 25 milion euro vetëm nga buxheti i shtetit, skema e mbështetjes së bujqësisë. Plus pastaj dhe 93 milion euro, që pritet me shumë gjasa, të fillojë vitin që vjen nga programi IPARD i Bashkimit Evropian. Kemi mundësi të shumta, që jo vetëm të promovojmë, të mbështesim dhe të nxisim. Por edhe të mbështesim me grante, subvencione, me mbështetje direkte financiare, për atë zinxhir blerës dhe për ato kultura, të cilat ne jemi duke i analizuar si me shumë potencial konkurrues për të ardhmen. Dhe padyshim bujqësia organike do të jetë një nga fushat, që ne do të mbështesim me grante, në mënyrë të posaçme”.
Ministri është ndalur të bashkëbisedojë edhe me nxënësit e shkollës së mesme “Kajo Karafili”, ku iu ka bërë thirrje të rinjve të përfshihen në sektorin bujqësor, si sektor prioritar për Qeverinë Shqiptare.
“Dua t’i them të gjithë të rinjve, apo atyre që kanë aftësi sipërmarrje, t’i kthejnë sytë tek bujqësia. Të zbulojnë një mozaik të madh mundësish, që ky sektor ka, bujqësia, por edhe blegtoria, të marrin mbështetjen dhe konsulencën e programeve të shumta, që Ministria është duke filluar, sidomos në bashkëpunim edhe me donatorët shumë të vyer, që kemi përkrahë.”
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.