Janar, bum padish ndaj tatimeve – 70 biznese në gjykatat administrative për xhirot e gjobat
Nga bankat, te kompanitë e sigurimit, te ato të ndërtimit apo të lojërave të fatit. Muaji janar ka shënuar një rritje të fortë të padive ndaj tatimeve nga ana e bizneseve. Janë rreth 70 kompani që gjatë këtij muaji i janë drejtuar gjykatave për të kontestuar mbivlerësimet e xhirove të bëra nga tatimet bashkë me gjobat e penalitetet përkatëse.
TV SCAN ka zbardhur të dhënat zyrtare të proceseve gjyqësore kundër tatimeve për muajin janar, të cilat rezultojnë shumë të larta duke parë se në total, më 31 dhjetor, numri i subjekteve që gjendshin në procese gjyqësore me tatimet ishte 349.
Bie në sy numri shumë i lartë numri i bizneseve të mëdha që kanë ngritur padi ndaj Drejtorisë së tatimpaguesve VIP. Numri i tyre është rreth 60 dhe në listë janë të përfshira disa prej kompanive me mjaft peshë në jetën ekonomike të vendit.
Ato i kërkojnë Gjykatës shfuqizimin e gjobave të kripura prej miliona lekëve, apo shfuqizimin e xhirove të caktuara pa të drejtë nga tatimet.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.