Janar-mars, bien shitjet e Renault – Ndikuan konflikti në Ukrainë dhe kriza e gjysmëpërçuesve
Prodhuesi perëndimor i makinave më i ekspozuar ndaj tregut rus, Renault, raportoi të ardhura më të ulëta në tremujorin e parë për shkak të luftës në Ukrainë dhe mungesës së gjysmëpërçuesve, kompensuar pjesërisht nga çmimet më të larta dhe rritja e shitjeve të automjeteve elektrike.
Grupi francez, që gjithashtu prodhon automjete të markës Dacia dhe Lada, tha se të ardhurat ranë me 2.7% krahasuar me një vit më parë në 9.748 miliardë euro. Duke përjashtuar aktivitetet e Avtovaz dhe Renault Rusia, ajo ra me 1.1% në 8.9 miliardë euro. Muajin e kaluar, Renault tha se do të pezullonte punën në fabrikën e saj në Moskë, ndërsa vlerësonte opsionet mbi aksionet e saj të shumicës në Avtovaz, prodhuesi numër 1 i makinave në Rusi.
Të ardhurat e ulta pasuan një rënie prej 17% të shitjeve të automjeteve të Renault kundrejt tremujorit të parë 2021, në 552,000 automjete, shitjet më të ulëta tremujore që nga kulmi i krizës financiare globale në 2009. Kompania tha se shitjet e saj të automjeteve plotësisht elektrike dhe hibride u rritën me 13% dhe përbënin 36% të totalit. Në një opinion, analistët e J.P. Morgan e përshkruan këtë si një “tremujor të fortë” për Renault. “Renault vazhdon të zbatojë politikën e saj të çmimeve dhe racionalizimit të modeleve dhe rezultati i sotëm vjen si i tillë një hap tjetër në drejtimin e duhur”, deklaruan analistët.
Sipas shifrave të industrisë, numri i automjeteve të reja të regjistruara në Bashkimin Europian, Britani dhe Shoqatën Europiane të Tregtisë së Lirë (EFTA) ra gati 11% në tremujorin e parë për shkak të ndërprerjeve të zinxhirit të furnizimit që janë përkeqësuar më tej nga konflikti në Ukrainë.
Mungesa e çipeve të shkaktuara nga pandemia, ka detyruar prodhuesit e automjeteve në mbarë botën të shkurtojnë ose pezullojnë prodhimin, duke rritur çmimet e automjeteve të reja dhe të përdorura, në mes të kërkesës së rritur nga konsumatorët.
Kriza globale e gjysmëpërçuesve do të ulë prodhimin e planifikuar të makinave të Renault me 300,000 automjete në vitin 2022, kryesisht në gjysmën e parë të vitit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.