BE-Japoni bëhen bashkë – Arrihet marrëveshja e tregtisë së lirë, mesazh për Trump

Ka qenë presidenti i Komisionit Europian, Jean Claude Juncker së bashku me kryeministrin japonez, Shinzo Abe, ata që dhanë lajmin e shumëpritur, atë të arritjes së marrëveshjes së tregtisë së lirë midis Bashkimit Europian dhe Japonisë.

Që këtej e tutje, dy vendet do të jenë shumë më afër njëra tjetrës, në terma tregtie. Marrëveshja mbulon thuajse një të tretën e Prodhimit të Brendshëm Bruto global, ose më saktë 30%, si dhe një zonë prej 600 milionë njerëzish.

Kjo marrëveshje vjen edhe si një mesazh për pjesën tjetër të botës sa i përket rëndësisë dhe simbolikës së marrëveshjeve të tregtisë së lirë, në një kohë që proteksionizmi po fiton gjithmonë e më shumë terren.

Në parim, marrëveshja ishte arritur në rrafshin politik që në korrikun e këtij viti, ndërkohë që vetëm së fundmi negociatorët i`a dolën të arrinin marrëveshjen edhe në rrafshin teknik.

“Përveç vlerës që përmban në vetvete, kjo marrëveshje ka një rendësi mjaft të madhe strategjike”, citojnë Juncker dhe Abe në deklaratën e tyre të përbashkët. Bashkimi europian dhe Japonia janë të angazhuara që ta mbajnë ekonominë botërore në shinat e tregjeve të lira.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.