Japoni, prishen 6,400 vaksina të Pfizer / Rritet papritmas temperatura e ruajtjes. Injektohen 4 të moshuar me to
Fushata e vaksinimit të Covid në Japoni është gjendur përballë gabimeve të shumta, ndërkohë që 4 banorë të moshuar në Tokjo u injektuan me vaksina të prishura dhe rreth 6,400 doza janë hedhur në periferi, për shkak të kushteve të papërshtatshme të magazinimit. Katër banorë mbi 70-vjeç u vaksinuan me vaksina që duheshin hedhur, sipas raportimeve nga mediat lokale. Pako ishte etiketuar si e “ndaluar për t’u përdorur” një ditë më parë, ndërkohë që temperatura e magazinimit ishte poshtë standardit. Katër individët nuk kanë raportuar ndonjë efekt anësor deri më tani dhe do të testohen për antitrupa në 2-3 javët e ardhshme, për të vlerësuar nëse do të duhet të vaksinohen përsëri. Paralelisht, një njësi e magazinimit që ruante në të ftohtë vaksina të Pfzier, ka pësuar një “dështim të temperaturës”, në qytetin periferik të Tokjos, Kawasai, sipas televizionit shtetëror në Japoni. Mjedisi i ftohjes, që supozohet të ketë temperatura në -80 deri në -60 gradë Celsius, u nxeh deri në 8 gradë në një moment. Hetimet zbuluan se ngrohja e papritur ndodhi në fundjavë, por nuk ishte zbuluar deri të Dielën pasdite, çka solli prishjen e 6,400 dozave. Japonia nisi vaksinimin e të moshuarve në mes të Prillit, pasi imunizoi punonjësit e shëndetësisë në Shkurt.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.