Japonia, në rimëkëmbje – Rritet për të 7-in tremujor radhazi, perspektiva qëndron e pozitive
Ekonomia e tretë më e madhe në botë u rrit sipër projeksioneve për tremujorin e tretë, duke publikuar edhe periudhën më të gjatë të rritjes në një dekadë. Produkti i Brendshëm Bruto i Japonisë u rrit me 0.3% nga tremujori i kaluar dhe me 1.4% me bazë vjetore. Analistët thonë se rezultati tregon për rimëkëmbjen e ekonomisë japoneze.
Produkti i Brendshëm Bruto është rritur për 7 tremujorë radhazi, që është periudha më e gjatë e ekspansionit që prej vitit 2011. Kërkesa e nga jashtë ishte kontribuuesi kryesor në rritjen e ekonomisë, duke i shtuar normës përfundimtare 0.5%, nxitur kjo nga dërgesat më të mëdha të makinave dhe pjesëve elektronike. Megjithatë, konsumi privat që përbën rreth 2/3-tat e PBB, ra me 0.5% nga tremujori i kaluar.
Rënia erdhi prej shpenzimeve më të ulëta në restorante dhe hotele si dhe shpenzimeve për makina dhe aparatë celularë, tregojnë të dhënat zyrtare. Moti i keq ka ndikuar gjithashtu në shpenzimet për tremujorin e tretë. Shpenzimet kapitalie u rritën me 0.2%, poshtë vlerësimeve të analistëve.
Indeksi i titujve të kapitalit në vend, Nikkei 225 ra në nivelin më të ulët në 2 javë, me sektorët kryesor në performancë negative.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.