Japonia shpik maskën ‘inteligjente’ – Mund të përkthehet në tetë gjuhë të ndryshme

Kur pandemia Covid-19 i bëri maskat e fytyrës një aksesor thelbësor të përditshëm, startup-i japonez Donut Robotics vuri re një mundësi. Ata krijuan një maskë inteligjente – një modernizim të teknologjisë së lartë në mbulesat standarde të fytyrës, të dizajnuara për të bërë komunikimin dhe distancimin shoqëror më të lehtë.

Bashkë me një aplikacion, maska C-Face Smart mund të transkriptojë diktimin, të forcojë zërin e mbajtësit dhe të përkthejë fjalimin në tetë gjuhë të ndryshme.

Prerjet në pjesën e përparme janë thelbësore për frymëmarrjen, kështu që maska inteligjente nuk ofron mbrojtje kundër koronavirusit. Në vend të kësaj, ajo është krijuar për tu veshur mbi një maskë standarde për fytyrën, shpjegon CEO i Donut Robotics Taisuke Ono. E përbërë nga plastikë e bardhë dhe silikon, ajo ka një mikrofon të ngulitur në të që lidhet me smartphone-in e individit përmes Bluetooth. Sistemi mund të përkthehet mes 8 gjuhëve të ndryshme konkretisht: japonisht, gjuha kineze, koreane, vietnameze, indiane, anglisht, spanjisht dhe frëngjisht.

Donut Robotics së pari zhvilloi programin e përkthimit për një robot të quajtur Cinnamon – por kur goditi pandemia, projekti i robotëve u la në pritje. Pikërisht në këtë moment inxhinierët e ekipit dolën me idenë të përdornin softuerin e tyre në një maskë për fytyrën.

Çipi Bluetooth i maskës mund të lidhet me telefonat inteligjentë deri në 10 metra larg, thotë Ono. Ai shpreson që maska do të bëjë që normat e reja të distancës sociale në vendet përfshirë spitalet dhe zyrat të bëhen më të lehta, duke mundësuar komunikim të mirë. “Ne kemi akoma shumë situata kur duhet të takohemi personalisht,” thotë ai. “Në këtë normalitet të ri … maska dhe aplikacioni janë shumë të dobishëm.”(CNN)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.