Java e dhjetë e aksionit anti-informalitet – Regjistrohen 4928 biznese të reja dhe futen në tregun e sigurimeve 969 punonjës
Drejtoria e Përgjithshme e Tatimeve, përmes një njoftimi për mediat bën të ditur se është mbyllur java e dhjetë të aksionit anti-informalitet.
Në këtë njoftim theksohet se në të gjithë territorin e vendit janë verifikuar rreth 25 311 subjekte, ku 20 për qind e tyre kanë rezultuar me shkelje, dhe për pasojë janë penalizuar. Ndërkohë që janë futur në skemën e sigurimeve shoqërore dhe shëndetësore, gjatë dhjetë javëve të para të aksionit 969 punonjës që janë konstatuar të padeklaruar.
Po kështu gjatë këtyre javëve janë regjistruar 4928 subjekte të reja, si dhe janë mbyllur 549 subjekte të paregjistruara në organet tatimore, për shkelje të tjera përfshirë edhe mos lëshimin e kuponit tatimor për here të dytë.
“Shërbimi i tatimpaguesve ka asistuar ballë për ballë, 66 647 tatimpagues. 10 779 është numri i tatimpaguesve të kontaktuar për ligjin e faljes. Mbi 28 081 tatimpagues të kontaktuar për të nxitur vetëkorrigjimin, ndërkohë janë kryer 11 650 vizita këshilluese, janë organizuar 86 takime me komunitetin e biznesit në territor.
Qendra e thirrjeve ka vijuar të ofrojë shërbimet në numrin e vënë në dispozicion për çdo tatimpagues, duke asistuar rreth 15 628 telefonues, si dhe përdorues të live chat”, thuhet në njoftimin e Drejtorisë së Përgjithshme të Tatimeve.
Nga ana tjetër, bëhet me dije se për dhjetë javët e para është mundësuar përfundimi i 15 832 kontrolleve nga zyra, vizitave fiskale apo verifikimeve në terren, ku kontrollet nga zyra përbëjnë 69 për qind të totalit.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.