Java e Parasë 2018 – Shtatë ditë me aktivitete për edukimin financiar
Java që sapo filloi do të jetë Java e Parasë 2018. Kjo javë festohet për vitin e dhjetë radhazi në Shqipëri dhe ka synim kryesor ndërgjegjësimin lidhur me rëndësinë e edukimit financiar të publikut.
Gjatë gjithë kësaj jave, Banka e Shqipërisë, në bashkëpunim me Ministrinë e Arsimit dhe Shoqatën e Bankave, do të organizojnë aktivitete të ndryshme, me qëllim rritjen e përfshirjes financiare të fëmijëve dhe të të rinjve, duke u mësuar si të kujdesen për paratë, si të kursejnë, si të mendojnë financiarisht, si të fitojnë të ardhura nëpërmjet sipërmarrjes dhe të vendosin bazat për të ardhmen e tyre, nëpërmjet kulturës financiare.
Gjatë ceremonisë së hapjes së javës së parasë, u shpërndanë çmimet për fituesit e konkurseve të organizuara nga Banka e Shqipërisë me nxënësit e shkollave 9-vjeçare, të mesme dhe me studentët e universiteteve.
Këtë vit, java e parasë organizohet sipas temës “paraja: ç’të mbjellësh, do të korrësh”. Java e parasë festohet njëkohësisht në 135 vende të Botës.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.