Java fillon në rënie për naftën – Rritja e prodhimit në SHBA, presion mbi çmimet
Çmimet e naftës po qëndrojnë në rënie në sesionin e parë të kësaj jave, për shkak të rritjes së prodhimit të naftës në SHBA, që ka eklipsuar të dhënat që treguan një ngadalësimi të aktivitetit të shpim-kërkimit.
Nafta Bruto amerikane po tregtohet në rreth 61.9 dollarë për fuçi, ndërsa nafta Brent e Londrës po tregtohet në rreth 65.3 dollarë për fuçi. Analistët shprehen se, edhe skadimi i kontratave afatgjata ka kontribuar në rënien e çmimeve.
Menaxherët e parave likuiduan 15,416 kontrata afatgjata, gjatë javës së kaluar, dhe krijuan 4,386 kontrata të reja afatshkurta. Megjithatë, humbjet po kufizohen nga të dhënat pozitive mbi punësimin në SHBA. Sipas Departamentit të Punës, ekonomia më e madhe në botë, krijoi 313 mijë vende të reja pune, gjatë shkurtit, niveli më i lartë në 1 vit e gjysmë.
Për sa i përket të dhënave të tjera, kompanitë amerikane të energjisë ulën aktivitetin e shpim-kërkimit me 4 puse, në totalin e 796 puseve. Kjo ishte hera e parë në dy muaj, që ky aktivitet shënoi rënie.
Por, pavarësisht rënies së lehtë, krahasuar me një vit më parë, shifra është shumë më e lartë, pasi në mars të 2017, puse aktive ishin 617.
Shumica e analistëve presin që prodhimi në SHBA të rritet pranë 11 milionë fuçive në ditë, një nivel i përafërt me Rusinë, që është prodhuesi më i madh në botë.
Që nga mesi i vitit 2016, prodhimi në SHBA është rritur me 1/5. Në anën tjetër, ministri iranian i naftës deklaroi se, në muajin qershor, OPEC dhe aleatët e tjerë, me në krye Rusinë, do të diskutojnë alternativat për të dalë nga marrëveshja për uljen e prodhimit me 1.8 milionë fuçi në ditë, e cila skadon në fund të këtij viti.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.