Javë vendimtare për Italinë! – Do të shihet nëse masat kundër koronavirusit kanë qenë efektive
Kjo javë do të jetë vendimtare për të parë nëse masat e qeverisë italiane kanë përmbajtur koronavirusin, përfshirë vendosjen në karantinë të qyteteve të tëra, ndalimin e udhëtimit dhe mbylljen e vendeve publike. “Nëse infeksioni bie brenda 7 ditëve të ardhshme, kjo nënkupton se masat kanë qenë efektive”, tha presidenti i Institutit Kombëtar të Shëndetit, Silvio Brusaferro për La Republica. Komentet vijnë ndërkohë që Italia po përballet me një nga sfidat më të mëdha të shëndetit publik në kohën moderne.
Deri ditën e Hënë, vendi konfirmoi 1,600 të infektuar dhe 34 të vdekur nga koronavirusi. Shumë prej rasteve të përhapura në Europë e kanë pasur origjinën në Itali, ku rajonet më të ndikuara janë Lombardia dhe Veneto, që janë destinacione të mëdha të biznesit dhe turizmit. Autoritetet kanë bërë të ditur se shumëfishimi i infeksioneve në Itali me shumë mundësi ka ndodhur përpara se të vendoseshin masat e emergjencës.
Shumë vende, përfshirë SHBA, kanë këshilluar qytetarët që të mos udhëtojnë në Itali aktualisht dhe të vendosen vetë në karantinë, nëse kthehen nga Italia. Ministri i Ekonomisë, Roberto Gualtieri, lajmëroi në fundjavë se Italia do të prezantojë masa prej 3.6 miliardë euro për të mbështetur ekonominë. Këtu përfshihen kredite tatimore për kompanitë që kanë pësuar rënie prej 25% në të ardhura, si dhe fonde shtesë për shërbimet shëndetësore të vendit. Italia ka bërë të ditur se mund t’i kërkojë BE liri në defiçitin buxhetor, që është pika kryesore e konfliktit mes Romës dhe Brukselit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.