Jeff Bezos ndërton orën gjigante në brendësi të një mali – Pritet të tregojë kohën edhe për 10,000 vitet e ardhshme

Një orë 150 metra e gjatë, e projektuar për të punuar për 10,000 vitet e ardhshme pritet të instalohet brenda një mali në Teksasin Perëndimor.

Kjo ide u prezantua fillimisht nga shpikësi Danny Hillis në vitin 1995, i cili parashikonte një orë që të dëgjohet një herë në vit dhe me një prej shigjetave të saj të lëvizë para një herë në shekull dhe një tingull në formë “kuku-je” të dëgjohet një herë në 1000 vjet.

Sot ky projekt mbështetet nga CEO i Amazon, Jeff Bezos, i cili thuhet se ka kontribuar 42 milionë dollar.

“Është një orë e veçantë, e projektuar për të qenë simbol, një ikonë për mendimin afatgjatë”, shprehet ai në një postim.

Bezos gjithashtu ka marrë një rol aktiv në hartimin e orës, e cila është ndërtuar pjesërisht nga përdorimi i çelikut të inoksit të klasës detare 316.

Megjithatë, disa nga pjesët lëvizëse do të bëhen prej guri dhe qeramikës së teknologjisë së lartë në mënyrë që të shmanget veshja apo gërryerja.

Gjithashtu edhe të gjitha kushinetat e kësaj ore do të jenë prej qeramike, për shkak se lëvizjet e tyre do të jenë shumë të rënda dhe do të rrotullohen me një shpejtësi shumë të ulët.

Sipas Fondacionit “Long Now” kjo orë do të përdorë energjinë që do të marrë nga ndryshimet e temperaturës dhe do të jetë në gjendje ta masë vetë kohën.

“Për sa kohë dielli të shkëlqejë dhe nata të vijë, ora mund ta masë vetë kohën pa patur nevojë për ndihmë njerëzore”, shprehet një zëdhënës i fondacionit.

V.H/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.