Jelek-verdhët nuk trembin turistët: Shifrat pranë rekordit të vitit të kaluar, Brexit ka pakësuar britanikët!
Turistët në kryqytetin francez nuk janë ndalur këtë vit nga jelek-verdhët e as nga Brexit. Shirat më të fundit flasin për 17.28 milionë turistë në vend gjatë gjysmës së parë të vitit, nga 17.29 milionë gjatë së njëjtës periudhë të vitit të kaluar. Pak më shumë se 17 milionë turistët që kanë vizituar Parisin gjatë këtij viti kanë shpenzuar rreth 10 miliardë euro, thonë të dhënat e fundit.
Kështu jelek-verdhët duket se nuk kanë trembur turistët për të vizituar një prej destinacioneve kryesore turistike në botë. Por, nga ana tjetër, Brexit ka pasur pasoja, të dhënat flasin për rreth 304 mijë britanikë më pak krahasuar me vitin e kaluar, Brexit ka rrëzuar monedhën britanike, ç`ka ka bërë që turistët nga ishulli të kenë një fuqi blerëse më të dobët krahasuar me më parë. Autoritetet vendase shprehen se, pavarësisht numrit mjaft të lartë të turistëve, Parisi nuk vuan nga mbipopullimi i turistëve, siç vuajnë qytete si Barcelona apo Venecia.
Problemi më i madh në Paris me numrin e lartë të turistëve regjistrohet në muzeun e Luvrit, vend i cili mikpriti 10.2 milionë turistë vitin e kaluar. Franca është vendi më i vizituar në botë, me 89.4 milionë turistë gjatë vitit të kaluar.
Roel Korkuti/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.