Jemi të fundit në Europë për blerjet online – Vetëm 10% e përdoruesve të internetit, në Kosovë norma ngjitet në 33%

Shqipëria është vendi i fundit në Europë sa i përket blerjeve online, tregojnë shifrat më të fundit nga Agjencia Europiane e Statistikave (Eurostat). Sipas të dhënave që i referohen vitit 2010, rezulton se, mes shqiptarëve që e përdorin internetin, vetëm 10% e tyre kanë kryer të paktën një blerje online gjatë 12 muajve paraardhës të anketës.  Kjo shifër është padiskutim më e ulta në Europë, ndërkohë që mesatarja e Bashkimit Europian fiksohet në 68%, tregojnë numrat.

Në Kosovë, Bosnje Hercegovinë dhe Maqedoni të Veriut kjo normë ngjitet mbi 30%, ndërkohë që në Serbi, prek atë të 44%. Mali i Zi e ka këtë normë në 21%, që është edhe vendi i parafundit në renditje, para Shqipërisë. Për vitin 2018 ndërkohë, norma në vendin tonë fiksohej në 8%.

Pritjet janë që me pandeminë, blerjet online në vendin tonë të jenë zgjeruar. Një raport i publikuar së fundi nga Banka Botërore për e-commerce në vendin tonë, veçse nxjerr në pah pikërisht faktin që jemi të fundit në rajon, vë theksin edhe te primitiviteti i blerjeve online në Shqipëri, sidomos sa i përket pagesave, në pjesën dërrmuese të kryera cash në dorëzim, ndërkohë që pagesat me kartë online janë të preferuarat në europë, por edhe në rajon Edhe burimi rezulton në masë të jenë rrjetet sociale.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.