Jemi vendi më i dobët në anglisht – Indeksi i njohjes së gjuhës angleze, vetëm Turqia më keq se ne në Europë
Shqipëria klasifikohet si një vend me njohje të ulët të gjuhës angleze. Të paktën kështu thuhet në përfundimet e Indeksit të Aftësisë së Gjuhës Angleze 2018. Ky është viti i parë që Shqipëria përfshihet në këtë indeks. Renditja na pozicionon në vendin e 52-të në botë, ndër 88 vende. Vendi ynë grupohet ndër ato shtetet që kanë një aftësi të ulët të gjuhës angleze, që është edhe ajo më e përhapura në botë.
Duke pasur parasysh faktin se, prej vitesh tashmë, gjuha angleze është e pranishme në thuajse çdo shkollë të vendit, ky klasifikim është alarmant. Gjuha angleze është një domosdoshmëri thuajse e pashmangshme në tregun e punës në vend, por edhe jashtë, ndërkohë që është detyrim për arsimin e lartë. Mosnjohja e saj sjell problem të mëdha në të dyja drejtimet, në arsim dhe në tregun e punës. Në klasifikim nuk janë përfshirë pjesa dërrmuese e fqinjëve tanë të Ballkanit Perëndimor.
Por, siç e tregon qartë harta, ku Shqipëria ilustrohet me ngjyrën e verdhë, ne jemi populli më pak anglishtfolës në kontinentin e vjetër, pas Turqisë. Vendi me nivelin më të lartë të njohjes së gjuhës angleze në Botë është Suedia.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.