Jetesa në Maqedoni, anketa e Entit Shtetëror për Statistikat: 2016-ta më keq se 2015-ta për qytetarët
Një në tre familje në Maqedoni në vitin 2016 ka jetuar më keq se viti 2015. Anketa e Entit Shtetëror për Statistikë tregon se standardin më të mirë jetësor e kanë pasur vetëm 5.4% e qytetarëve, ndërsa rreth 60% e tyre nuk shohin ndryshime në gjendjen financiare. Vetëm 6% kanë deklaruar se mund të blejnë çdo gjë që u nevojitet. “Maqedonia nuk është aq edhe vend i varfër sa e bëjnë elitat politike në 27 vitet e fundit”, thotë aktivisti për të drejtat e punëtorëve, Zdravko Saveski. Sipas tij, në vend ka thellim konstant të dallimeve klasore.
“Përderisa një numër i madh janë të varfër, një numër edhe më i madh janë në proces varfërie. Klika e vogël në Maqedoni, nuk e di sa para ka në llogaritë bankare dhe nuk di çfarë të bëjë me to.” – deklaroi Zdravko Saveski, aktivist për të drejtat e punëtorëve.
Saveski vlerëson se për t’i shëruar këto plagë, qeveria e re patjetër të ketë politika në dobi të shumicës së varfër.
“Nuk mjafton vetëm hapja e vendeve të reja të punës sepse një pjesë e madhe e të punësuarve tek ne marrin rroga që garantojnë se nuk do të dilni nga varfëria. Do të thotë patjetër të respektohen të drejtat punëtore dhe të punësuarit të marrin rroga dinjitoze e jo rroga që u garantojnë varfëri”, tha Saveski.
Sipas raportit të fundit të Bankës Popullore, shkalla e varfërisë në Maqedoni në vitin 2016 ka qenë 30.7% respektivisht çdo i treti qytetar ka jetuar me më pak se 5 dollarë në ditë.
Gjendja financiare në krahasim me vitin e kaluar
Shumë mirë 0.2%
Pak më mirë 5,2%
E njëjtë 58,5%
Pak më keq 23,3%
Shumë më keq 12,8%
A i kënaqin të ardhurat mujore nevojat
Në tërësi i kënaqin 5,7%
Kryesisht i kënaqin 33,3%
Kryesisht nuk i kënaqin 36,8%
Tërësisht nuk i kënaqin 24,1%
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.