Jo “heshtje” në Francë – Bankat në gatishmëri 24 orë, të dielën e vërteta
Francezët i drejtohen kutive të votimit të Dielën në raundin e parë të zgjedhjeve presidenciale, nga ku do të dalin emrat e dy finalistëve të garës përfundimtare të 7 majit.
Në garë janë katër kandidatë pretendentë, të cilët ndahen me një diferencë mjaft të vogël nga njëri tjetri, tregojnë sondazhet, dhe dy nga këta katër kandidatë, përfaqësojnë dy ekstreme të ndryshme, njëri majtas e tjetra djathtas.
Sondazhet e fundit nxjerrin favorit në garë Emmanuel Macron, i pavarur, i cili projektohet të marrë 24.5% të votës popullore në raundin e parë. Le pen renditet e dyta me 22.5%.
Më pas ndjekin Francois Fillon dhe Jean Luc Melenchon me 19.5% dhe 18.5% respektivisht. Benoit Hamon, i socialistëve projektohet të marrë vetëm 7% të votave, duke vulosur kështu dështimin e qeverisë së majtë aktualisht në pushtet.
Pavarësisht se në heshtje elektorale, Franca nuk do të jetë aspak e qetë gjatë kësaj fundjave, e sidomos bankierët dhe aktorët e tregut.
Bankat më të mëdha në vend kanë lajmëruar se do të qëndrojnë operative gjatë mbrëmjes të së Dielës, në pritje të rezultateve dhe në pararojë të çdo surprize të pakëndshme për tregjet.
Skenari më i pëlqyer nga tregjet është ai, i një fitore në raundin e parë të Macron dhe Fillon, ndërkohë që fitorja e Le Pen apo Melenchon pritet të prodhojë mjaft trazira në tregje.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.