Jo më interesa negative në Suedi – Banka e parë që përfundon eksperimentin pas 5 vitesh të stimujve

Banka Qendrore e Suedisë, Riksbank, që është dhe banka më e vjetër në botë, përfundoi eksperimentin 5-vjeçar me norma negative të interesit, duke rritur normën e marrëveshjeve të riblerjes (repo) me .25% në 0%. Rritja e interesave nga 0.25% e bën Riksbank institucionin e parë që rikthehet nga normat negative të interesit. Interesat janë ende negative në Eurozonë, Japoni, Danimarkë, Zvicër dhe Hungari.

Përveç Hungarisë interesat pritet të qëndrojnë poshtë zeros për një kohë të gjatë. “Një normë bazë interesi në 0 , së bashku me blerjet në treg të hapur, nënkupton se politikat monetare janë ende lehtësuese”, tha guvernatori i Riksbank, Stefan Ingves. Banka Qendrore përsëriti se norma e marrëveshjeve të riblerjes do të mbesë e pandryshuar deri në vitin 2021. Krona suedeze u rrit kundër euros pas vendimit. Banka Qendrore më e vjetër në botë uli interesat në -0.1% në vitin 2015, prej shqetësimeve se kriza e Eurozonës do të krijonte një spirale të deflacionit të stilit japonez.

Institucioni u detyrua të vazhdonte lehtësimin duke çuar interesat në -0.5% në vitin 2016, përpara se stimujt e mëdhenj të dobësonin valutën, rrisnin çmimet e importit dhe nxisnin ekonominë e varur nga eksportet. Pas viteve të rritjes së fortë ekonomike, prodhimi është ngadalësuar këtë vit dhe inflacioni qëndron poshtë objektivit prej 2%. Megjithatë, Riksbank ka bërë të ditur se interesat negative po dëmtojnë ekonominë në mënyrë të tjera.

Kursimtarët kanë pësuar goditje, tregu i pronave është fryrë dhe familjet e korporatat kanë marrë më shumë borxh, duke kërcënuar një krizë financiare nëse vjen ndonjë goditje e papritur. Kreditë e lira kanë mbajtur gjithashtu në këmbë firmat e ashtuquajtura “zombie”, që përndryshe do të dështonin, duke ulur kështu produktivitetin.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.