“Jo ujëra të zeza në Lungomare” – Gjiknuri: Gati financimi nga buxheti, puna nis vitin që vjen
Ujërat e Zeza në zonën e Lungomares në Vlorë nuk do të derdhen më në det. Ministri i Infrastrukturës dhe Energjisë, Damian Gjiknuri tha se vitin që vjen do të nisë zbatimi i projektit, i cili pritet të japë një impakt të drejtpërdrejtë në turizëm.
“Vitin tjetër do të fillojmë edhe projektin e madh për sistemin e gjithë ujërave të zeza. Kështu që pjesa e Lungomares pas përfundimit të atij projekti, – projekti tashmë është përfunduar, qeveria ka llogaritur edhe financimin, – do të marrë një zgjidhje përfundimtare. S’do të ketë më derdhje të ujërave të zeza në Lungomare, kështu që një plagë e hapur e vjetër, ku ankoheshin të gjithë qytetarët dhe turistët, do zgjidhet.” – tha Gjiknuri.
Financimi për këtë investim është parashikuar në buxhetin e vitit të ardhshëm, ndërkohë që sipas ministrit, me fillimin e vitit do të hapet gara tenderuese dhe më pas do të fillojë puna për të stabilizimin e ujërave të zeza, të gjithë zonës në krah të Lungomares.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.