Johnson kërkon brexit! “Populli na dha mandatin për të dalë nga BE më 31 Janar”

Boris Johnson, pas zgjedhjeve të së Enjtes dhe fitores së thellë të partisë së tij, bëri thirrje për eleminimin e ndasive mbi brexit, pasi sipas tij, këto zgjedhje treguan se partia e tij ka marrë një mandat të qartë për ta nxjerrë Britaninë nga Bashkimi Europian më 31 janar të vitit që vjen. Johnson, fytyra e referendumit për të dalë nga unioni në vitin 2016, e çoi përpara fushatën elektorale të zgjedhjeve të fundit, me moton:

“T`i japim fund Brexit”, duke premtuar se do t`i japë fund paralizës në lidhje me këtë çështje, si dhe të shpenzojë më shumë për shëndetësinë, edukimin dhe policinë. Johnson ka korrur fitoren më të thellë që prej kohës kur Margareth Thatcher në vitin 1987 shkatërronte laburistët. Mazhoranca e konservatorëve tanimë është e thellë, me 80 vota. Konservatorët kanë marrë 365 vende në parlamentin e ri, ndërsa laburistët  vetëm 203 të tilla.

Që prej referendumit çështja e brexit e ka trazuar Mbretërinë e Bashkuar, duke paralizuar thuajse çdo gje në pritje të daljes nga unioni. Johnson bëri thirrje për t`i dhënë fund kësaj dhe për të filluar procesin e shërimit të Britanisë së Madhe. Britanikët duket se e dëgjuan.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.