Johnson kundër Hunt! Njëri do të bëhet Kryeministër. Të dy premtojnë Brexit

Dy politikanët që po konkurrojnë për t’u bërë kryeministri i ardhshëm i Britanisë, premtuan se do përgatiten për të nxjerrë Britaninë jashtë Bashkimit Europian pa një marrëveshje, pavarësisht se nuk është opsioni i preferuar.  Ish-Kryebashkiaku, Boris Johnson, u përball me sekretarin e jashtëm Jeremy Hunt, në një debat të partisë Konservatore.

Dalja pa marrëveshje nënkupton se nuk do të ketë periudhë të tranzicionit, që është skenari më negativ për shumë biznese.  Disa politikanë pro-europianë, kanë thënë se do të bllokojnë kryeministrin e ri për të nxjerrë Britaninë pa marrëveshje.  Johnson ka qenë optimist, duke premtuar se Britania do të dalë nga Bashkimi Europian më 31 Tetor me çdo kusht, pavarësisht se ka thënë se shanset e daljes pa marrëveshje janë 1 në 1 milionë.  Gjatë fjalimit përballë anëtarëve të partisë Konservatore që do të zgjedhin kryeministrin e ardhshëm, Johnson u përpoq të zbusë shqetësimet se Brexit pa marrëveshje do të godasë industrinë e aviacionit në Britania dhe furnizimet e ushqimeve.

Jeremy Hunt tha se nuk ka ndonjë ndryshim të madh mes strategjisë së tij për Brexit dhe asaj të Johnson, por e shfaqi veten si një negociator më të mirë,  duke thënë se mund të arrihet një marrëveshje e re për Brexit.   Më 23 Korrik do të lajmërohet se kush nga këta të dy do të jetë Kryeministri i ardhshëm i Britanisë.

Klevis Llaha/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.