Juncker: Në Tiranë jo për premtime boshe, por të inkurajoj Shqipërinë të vazhdojë reformat
Presidenti i Komisionit Europian Jean Claude Juncer i shoqëruar nga Komisioneri për Zgjerim, Johanes Hanh kanë mbërritur në Shqipëri në kuadër të prezantimit të strategjisë së re të Zgjerimit të BE-së për vendet e Ballkanit Perëndimor. Ai është pritur nga kryeministri Edi Rama, ku më pas kanë mbajtur edhe një konferencë për mediat.
Rama tha në fjalën e tij se Shqipëria është në pritje të hapjes së negociatave pasi sipas tij vendi ynë i ka bërë detyrat e shtëpisë, duke vënë theksin te reforma në drejtësi dhe procesi i Vettingut.
“KE ka dominuar që në vitin 2016 në çeljen e negociatave për integrim duke nënvizuar çuarjen para të Vettingut. Sot numërojmë 17 gjyqtarë dhe prokurorë që janë tërhequr nga procesi i Vettingut dhe nuk do të jenë pjesë e drejtësisëe. Besoj se e meritojmë fort çeljen e negociatave sepse i kemi kryer detyrat e shtëpisë,” tha Rama.
Ndërkohë, nga ana tjetër Juncker tha se arsyeja e vizitës tij së bashku me komisionerin Hanh është një mënyrë për të mbështetur punën e reformave të cilat kanë nisur, dhe jo për të bërë premtime, duke mos dhënë një datë të saktë për hapjen e negociatave.
“Konstatoj me kënaqësi që Shqipëria nuk pushon së akumuluari progrese, sepse ka marrë shumë reforma strukturore në shumë fusha në jetën tuaj kombëtare, të cilat janë impresionante. Edhe këto progrese janë mbresëlënëse. Nëse këto vazhdojnë në këtë rrugë reformash, kjo do t’i lejojë Shqipërisë që Komisioni Europian të rekomandojë hapjen e negociatave.
Nuk kam ardhur në Tiranë për të bërë premtime bosh. Është shumë e lehtë që për të dhënë kënaqësi, t’ju them në këtë datë apo në atë datë do fillojmë negociatat, por nuk është ky qëllimi im. Por vetëm mund të inkurajoj Shqipërinë që të vazhdojë reformat e rëndësishme, që janë ndërmarrë sidomos në luftën kundër krimit, vetting-ut, organizimit të gjykatave. Ne do jemi përkrah Shqipërisë për ta ndihmuar të përgatisë anëtarësimin.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.