Justifikimi i pasurisë familjare – Vetting-u, shtyhet vendimi për Gjyqtaren e Kushtetueses, Altina Xhoxhaj

Vendimi për konfirmimin në detyrë apo e shkarkimin e anëtares së Gjykatës Kushtetuese Altina Xhoxhaj është shtyrë për më datë 5 maj. Komisioni i Pavarur i Kualfikimit bëri me dije se shkak janë bërë verifikimet e të dhënave financiare të paraqitura nga Xhoxhaj për të justifikuar pasurinë. Sipas trupit gjykues, të dhënat e paraqitura nga gjyqtarja gjatë seancës dëgjimore janë voluminoze dhe verifikimi i tyre kërkon kohë.

Sipas vlerësimeve të këtij Komisioni Xhoxhaj nuk justifikon blerjen e një apartamenti 101 metra katrorë në Tiranë, dhe një tjetër apartamenti bashkë me 221 metra katrorë truall në Gjirin e Lalzit.  Gjithashtu, për vitet 2003-2004, deklarimet e të ardhurave rezultojnë të pasakta pasi ato nuk justifikojnë një shumë parash prej 4 milionë lekësh.  Në seancën dëgjimore Xhoxhaj paraqiti të dhëna për të ardhurat financiare të familjarëve, të cilat, sipas saj, nuk qenë marrë parasysh nga Komisioni i Vetting-u.

Ndërkohë që nuk është vetëm pasuria ajo që rrezikon ndërprerjen e karrierës së gjyqtares Altina Xhoxhaj. Në adresë të saj ka ardhur një ankesë nga një qytetar me inicialet BC, i cili fillimisht ishte dënuar nga babai i Xhoxhajt, edhe ai gjyqtar. Shtetasi më fjalë më pas është ankimuar në Kushtetuese, ku është rrëzuar nga vetë gjyqtarja Altina Xhoxhaj që ka shqyrtuar çështjen.  Duke  vijuar në aspektin profesional, Komisioni i Vetting-ut ka sjellë në vëmendje edhe disa vonesa të afateve të dosjeve në gjykim.

Shkarkimi i mundshëm i Xhoxhajt do të fusë në krizë të thellë Gjykatën Kushtetuese, e cila rrezikon të mbetet me vetëm katër anëtarë dhe tërësisht jashtë funksionit.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.