Kabineti qeveritar, në 4 vite ndryshuan 11 ministra

Brenda mandatit 4-vjeçar kabineti i qeverisë Rama ka pësuar ndryshime të shumta, me dorëheqje apo edhe shkarkime. Në total, rezulton se me lëvizjet e fundit, kabineti shënon ndryshimin e 11 ministrave.

Më 1 gusht të 2014, ku qeveria ende nuk kishte mbushur një vit në qeverisje, vjen edhe ndryshimi i parë. Ilirjan Celibashi, ministër i Shtetit për Marrëdhëniet me Parlamentin dha dorëheqjen, duke deklaruar asokohe se vendimi ishte për arsye personale. Postin e tij kryeministri Rama ia besoi deputetes së PS-së Ermonela Felaj.

Pa kaluar një vit nga ndryshimi i parë, në maj të vitit 2015 vjen një tjetër ndryshim, dhe këtë herë arsyeja ishin zgjedhjet vendore, raporton Scan.

Kryetari i Bashkisë së Tiranës Erion Veliaj që deri në maj të 2015 mbante postin e Ministrit të Mirëqenies Sociale dhe Rinisë, u tërhoq për të garuar në zgjedhjet vendore, ndërsa u zëvendësua me deputetin e PS Blendi Klosin.

Në vitin 2015 kabineti pësoi edhe një tjetër ndryshim, ketë herë në përfaqësimin e LSI.  Nasip Naço, ministër i Drejtësisë jep dorëheqjen ne 9 nëntor për arsye personale. Ylli Manjani, e zëvendësoi në postin e Ministrit të Drejtësisë. Naço, në deklaratën e dorëheqjes shprehej se jepte dorëheqjen, duke shpresuar se ky akt te ndihmonte në krijimin e klimës së bashkëpunimit të kërkuar për reformën në drejtësi.

Përpos shkarkimeve dhe dorëheqjeve, në qeveri ka pasur edhe lëvizje të brendshme. Më 16 shkurt të vitit 2016 Ministri i Financave Shkëlqim Cani jep dorëheqjen dhe në vend të tij emërohet Arben Ahmetaj. Ndërsa vendin e  Ahmetajt, si ministër i Ekonomisë, Tregtisë, Turizmit dhe Sipërmarrje e zë Milva Ikonomi, e cila deri në atë moment mbante pozicionin e Zv/Ministres së Shëndetësisë.

Më 2 shtator të vitit të shkuar në radhët e përfaqësimit të LSI-së në qeveri një tjetër ministër jep dorëheqjen. Edmond Haxhinasto, ministri i Transporteve jep dorëheqjen “për shkak të angazhimit në parti”. Në vend të Haxhinastos u vendos Sokol Dervishaj, i cili mbante postit e shefit të kabinetit të kryetarit të Kuvendit Ilir Meta.

Më 30 shtator të këtij viti kryeministri Edi Rama, pas një takimi me kreun e Kuvendit Ilir Meta, në zyrën e këtij të fundit, firmosi shkarkimin nga detyra të Ministrit të Drejtësisë Ylli Manjani. Më herët, Manjanit iu kërkua dorëheqja, por ai publikisht tregoi se nuk do të ikte vetë nga detyra. Në vend të tij u emërua kreu i grupit parlamentar të LSI-së, Petrit Vasili.

Një ditë më parë, 12 mars, në komunikimin e javës kryeministri Edi Rama konfirmoi zërat për ndryshime në kabinetin qeveritar. 4 ministrat që do të largohen nga kabineti  Në fjalën e tij, kryeministri tha se nga kabineti qeveritar do të largohen Ministri i Brendshëm Saimir Tahiri, ministri i Shëndetësisë Ilir Beqaj, ministri i Mirëqenies Sociale Blendi Klosi dhe ministri për Çështjet Vendore, Bledi Çuçi.

“Ndryshimet e qeverisë nuk reflektojnë asgjë tjetër përveçse domosdoshmërinë që udhëheqësit tanë politikë të fushatës së 18 qershorit të fokusohen me energji të reja dhe prani të vazhdueshme pranë njerëzve në përballimin e volumit të jashtëzakonshëm të kontakteve me njerëzit që kërkon kjo fushatë”, deklaroi Rama.

Gjatë ditës së sotme, 13 mars, kryeministri Edi Rama zyrtarizoi emrat e 4 ministrave të rinj. Pas mbledhjes së kryesisë, Rama tha për mediat se ministri i ri i Brendshëm do të jetë Fatmir Xhafaj, që do të zëvendësojë në detyrë Saimir Tahirin. Xhafaj aktualisht është kryetar i Komisionit të Ligjeve në Kuvend.

Në vend të Ilir Beqajt, ministrinë e Shëndetësisë do ta drejtojë Ogerta Manastirliu, drejtuesja e Qendrës Spitalore Universitare.

Në vend të Blendi Klosit si ministër i Mirëqenies Sociale është propozuar Olta Xhaçka, deputete e PS-së. Ndërsa në vend të Bledi Çuçit, ministrinë e Çështjeve Vendore do ta drejtojë Eduart Shalsi, aktualisht kryetar i Komisionit parlamentar të Veprimtarive Prodhuese.

Ky mund të konsiderohet numerikisht si ndryshimi më i madh që ka kaluar kabineti qeveritar që prej vitit 2013. Ndërkohë, nëse miratohen propozimet e reja, kabineti qeveritar do të ketë në përbërje 10 ministre e 9 ministra duke shënuar kështu “përmbysje” në raportin gjinor.

Eralda Zito/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.