Kadri Veseli premton rritje të pensioneve dhe pagave me 25 dhe 30 për qind  

Kryetari i PDK-së, Kadri Veseli ka thënë se “Fillimi i ri” garanton një reformë të thellë në shëndetësi, ku mjekët tanë do të kenë paga dhe trajtim dinjitoz. Në këtë mënyrë, tha Veseli, nuk do të ketë nevojë për trajtim jashtë vendit, por që shërbimet do të kryhen në Kosovë.

Ai premtoi edhe një herë rritje të pagave me 30% në sektorin publik dhe kjo do të ndikojë në një administratë më efikase dhe të përgjegjshme. Veseli, po ashtu, përmendi edhe rritjen e pensioneve me 25 % dhe një trajtim të merituar e të barabartë për personat me nevoja të veçanta.

Më tej, fuqizimi i rolit të gruas dhe rinisë, theksoi kryetari i PDK-së, Kadri Veseli, do të jetë një fokus i veçantë i angazhimit.

“Fuqizimi i rolit të gruas me politika stimuluese për to, për përkrahje për të qenë ndërmarrëse dhe kontribuuese në vendimmarrje dhe afarizëm, duke i ikur kurthit të mashtrimit social, që mund të izolojë ato nga ndërmarrjet dhe roli i tyre aktiv në institucione dhe shoqëri”, tha Veseli.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.