Kafeja ekspres/ Italianët nisin kandidaturën tek Unesco për ta ruajtur atë si trashëgimi kulturore
Dy vjet më parë, Italia ishte e suksesshme në njohjen e ushqimit shumë ikonik të Napolit si pjesë e trashëgimisë kulturore jo-materiale të botës të Unesco. Sot vendi dëshiron të bëjë të njëjtën gjë me një nga traditat e tij më të mira të ruajtura: kafen ekspres.
Kafeja është pija e dytë më e konsumuar në botë pas ujit. Lindja e makinës së parë ekspres, e shpikur në Itali në fund të shekullit të 19-të, ka kontribuar në popullaritetin e saj global.
Pirja e ekspresit në Itali është një mënyrë jetese, por për ata që janë pas aplikimit tek Unesco ka më shumë se kaq. Ilaria Danesi, anëtare e Konsorciumit për ruajtjen e kafesë tradicionale italiane Espresso tha për Euronews se kandidatura tek Unesco për ekspresin italian synon të “pretendojë origjinën dhe identitetin italian të ekspresit”: “Kjo për shkak se ekspresi buron nga krijimtaria e italianëve”, tha ajo .
Kur nuk janë në shtëpi, italianët e kanë ekspresin e tyre në bar kafe. Është një ritual i shpejtë. Ju porosisni në banak dhe e konsumoni atë në vetëm disa sekonda. Qëndrimi në bar dhe pirja e një kafeje ekspres është diçka që italianët nuk do të hiqnin dorë kurrë. Është një ndarje nga rutina e përditshme dhe shpesh është një justifikim për t’u takuar për të diskutuar biznes ose biseduar me një mik. Dhe mbi të gjitha: është e lirë, kështu që pavarësisht prejardhjes suaj, mund të shijohet dhe të përballohet nga të gjithë.
“Kafeja ekspres ndryshon nga llojet e tjera të pijeve që janë në dispozicion në të gjithë botën, pasi është e vetmja që ka “crema-n” tipike në sipërfaqe”, shpjegon Danesi. Në dhjetor, një grup që përfaqëson kafenë espresso napolitane gjithashtu paraqiti një kërkesë që do të shkojë së bashku me atë të Konsorciumit për ruajtjen e kafesë tradicionale italiane Espresso. (Euronews)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.