Kalata e trageteve në Sarandë në rikonstruksion, shpallet tenderi – Çfarë parashikon projekti?

Porti i Sarandës do të investojë në rehabilitimin e kalatës së trageteve Roro. Ky projekt, sipas dokumenteve të tenderit të shpallur në Agjencinë e Prokurimit Publik, përfshin sistemimin e kalatës së trageteve, shtrimin e sheshit me beton, si dhe vendosjen e pusetave ujëmbledhëse për largimin e ujërave të shiut.

Gjithashtu, territori do të rrethohet me kangjella, për të krijuar ndarjen e hapësirës së portit nga ajo e kalatës së madhe dhe njëkohësisht për të ndihmuar pasagjerët që zbresin nga trageti, të orientohen deri në hyrje të ndërtesës së terminalit.

Fondi që Porti i Sarandës ka vendosur në dispozicion për zbatimin e punimeve është 30 milionë lekë, e është projektuar edhe për vendosjen e pikave të furnizimi me energji elektrike si dhe ujit me parapagesë.

Projekti parashikon edhe ndërtimin e një rampe për të lehtësuar lëvizjen e personave me aftësi të kufizuara dhe pasagjerëve me valixhe.

Porti i Sarandës do të mbajë tenderin të hapur për të gjithë aplikantët e interesuar deri më 3 shtator, ora 13:00. Në përfundim të zbatimit të projektit, nisur nga detajet e punimeve, pritet një transformim i kalatës së trageteve Roro, krahasuar me gjendjen aktuale në të cilën ndodhet.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.