Kalendari punimeve në Kuvend – PPP dhe barnat do të diskutohet në Komisionet Parlamentare
Komisionet Parlamentare do të vijojnë me shqyrtimin e projektligjeve por edhe me shqyrtimin e kompetencave, që do të marrin ministritë e reja me ristrukturimin e tyre.
Sipas kalendarit të punimeve, të hënën pritet që të zhvillohen dy komisione, ai për Punën dhe Çështjet Sociale dhe Shëndetësinë si dhe Komisioni për Politikën e Jashtme.
Në komisionin e parë, Ministrja e Arsimit Rinisë dhe Sporteve do të japë informacion në lidhje me fushën e re të përgjegjësisë. Aty do të diskutohet edhe ristrukturimi i administratës për çështjet e rinisë.
Në Komisionin për Politikën e Jashtme do të bëhet prezantimi dhe miratimi në parim i projektligjit “për mbrojtjen e pakicave kombëtare në Republikën e Shqipërisë” si dhe do të diskutohen edhe çështje të tjera.
Referuar kalendarit të punimeve të Kuvendit deri më 13 tetor, komisionet duhet që të marrin në shqyrtim edhe një sërë projektligjesh të cilat edhe më herë kanë nxitur debate.
Kështu, në komisione do të diskutohet projektligji “për disa shtesa dhe ndryshime në ligjin “për koncesionet dhe partneritetin publik privat”, të ndryshuar si dhe projektligji “për një ndryshim në ligjin “për barnat dhe shërbimin farmaceutik” të ndryshuar.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.