Kalifornia, vaksina për fëmijët e shkollave – Guvernatori, jemi shteti i parë në SHBA që marrim këtë vendim
Kalifornia do të bëhet shteti i parë amerikan që do të nisë vaksinimet COVID-19 për nxënësit e shkollave, tha Guvernatori Gavin Newsom, ndërsa një raport i Reuters tregoi se Shtetet e Bashkuara tejkalojnë 700,000 vdekje nga koronavirusi.
“Shteti tashmë kërkon që studentët të vaksinohen kundër viruseve që shkaktojnë fruthin, shytat dhe rubeolën. Nuk ka asnjë arsye pse ne nuk do të bënim të njëjtën gjë për COVID-19,” tha guvernatori demokrat në një konferencë për mediat.
Newsom, tha se vendim,i mund të miratohet që në janar, pasi Administrata e Ushqimit dhe Barnave të miratojë plotësisht vaksinimet për grupmoshat e tyre. Kalifornia është shteti më i populluar. Shtetet e Bashkuara kanë raportuar mesatarisht më shumë se 2,000 vdekje në ditë gjatë javës së kaluar, duke përfaqësuar rreth 60% të kulmit të vdekjeve në janar, tregoi një analizë e Reuters.
Shtetet e Bashkuara mbajnë vendin e parë në botë për rastet dhe vdekjet e COVID-19, duke përbërë përkatësisht 19% dhe 14% të të gjitha infeksioneve dhe vdekjeve të raportuara. Në nivel global, pandemia pritet të kalojë 5 milionë vdekje.
Ndërsa numrat e shtrimit në spitale në SHBA kanë rënë javët e fundit, disa shtete, veçanërisht në jug të vendit, po e kapërcejnë atë prirje për të regjistruar rritje të mëdha, duke ushtruar presion mbi sistemet e kujdesit shëndetësor. Zyrtarët thonë se urdhrat e rreptë për shëndetin publik COVID-19 ndihmuan në ngadalësimin e transmetimit të virusit javët e fundit.
Mes një rritjeje kombëtare të rasteve të COVID-19 të nxitur nga varianti shumë i transmetueshëm Delta që çon në sëmundje serioze dhe vdekje kryesisht në mesin e njerëzve të pavaksinuar, disa shkolla në Kaliforni tashmë kanë urdhëruar vaksinat COVID-19 për disa studentë. Distrikti Shkollor i Unifikuar i Los Angeles, i dyti më i madh në vend, i kërkon ato për fëmijët mbi moshën 12 vjeç, për të cilët FDA ka autorizuar përdorimin e tyre emergjent.
Shkollat publike në San Diego do të kërkojnë vaksinim për studentët mbi 16 vjeç në dhjetor, dhe në Hoboken, New Jersey, studentët duhet të vaksinohen ose t’i nënshtrohen testimit javor për virusin.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.