Kalim klandestin drejt Francës për të kërkuar azil – SHÇBA arreston grupin ku bënte pjesë dhe 1 punonjës i Policisë Kufitare

Shërbimi për Çështjet e Brendshme dhe Ankesat, në Ministrinë e Punëve të Brendshme, ka njoftuar arrestimin e 1 punonjësit të Policisë Kufitare për korrupsion pasiv dhe të 2 shtetasve për dhënie ndihme në kalimin e paligjshëm të kufirit.

I koduar me emrin “Green Border 2”, operacioni goditi këtë rrjet trafikimi, i cili kundrejt pagesave që varionin nga 6 në 7 mijë euro për person u mundësonte shtetasve shqiptarë dhe të huaj kalimin e kufirit të gjelbër drejt Greqisë e Maqedonisë në mënyrë ilegale. Destinacioni final për këtë klandestinë ishte Franca, ku këta të fundit do të bënin edhe aplikimin për azil.

Pas hetimit me metoda speciale, SHÇBA njofton se ditën e diel u bë i mundur arrestimin në flagrancë në pikën e kalimit kufitar Kapshticë,  i punonjësit A.C. me detyrë kontrollor, si edhe i shtetasve M.S. dhe A.K. nga Korça.

Në disa raste këta shtetas, në bashkëpunim me punonjësin e policisë, tashmë të arrestuar, kanë kaluar nga kufiri i gjelbër, fëmijë të mitur, të cilët më pas kërkonin azil si të pashoqëruar, në vende të ndryshme të Europës. Hetimi do të vijojë pasi dyshohet se në rrjet janë të implikuar edhe persona të tjerë.

Finalizimi i ‘Green Border 2” vjen vetëm një ditë pas mbylljes së operacionit “Blue border”, ku një tjetër kontrollor në Stacionin e Policisë Kufitare të Portit të Vlorës u kap në flagrancë, pasi i kishte kërkuar 100 euro një shtetasi, i cili nuk përmbushte kushtet e kalimit në zonën Shengen.

Operacionet vijnë në një kohë kur Ministria e Brendshme ka shtënguar masat për shtetasit që tentojnë të kalojnë kufijtë në mënyrë të jashtëligjshme, ose që nuk justifikojnë arsyen e lëvizjes, nga frika e kërkesës për azil në vende të Bashkimit Europian.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.