Kalojnë me sukses – Vetting-un Gjyqtari Islamaj e prokurori Prençi konfirmohen në detyrë
Anëtari i Gjykatës së Lartë Edmond Islamaj dhe Prokurori i Krimeve të Rënda Dritan Prençi kanë kaluar me sukses sitën e Vetting-ut, duke u konfirmuar në detyrë. Sipas Komisionit të pavarur të Kualifikimit, të dy kanë justifikuar kriteret e pasurisë, integritetit dhe profesionalizmit.
Sipas Komisionit të Pavarur të Kualifikimit, Gjyqtari Islamaj zotëron një apartament prej 81.5 metrash katrorë të dhuruar nga prindërit, 1 mijë metra tokë arë në Karpen dhe një llogari bankare prej 20 mijë eurosh. Ndërkohë që bashkëjetuesja e tij zotëron 1 apartament bashkë me një dyqan dhe një garazh në Durrës, si dhe dy garsoniere te Shkëmbi i Kavajës, të përfituara nga pronësia e tokës së babait të saj mbi sipërfaqen ku më pas është ndërtuar një pallat.
Në seancën dëgjimore, Gjyqtari Islamaj tha se të gjitha pronat familjare ishin rrjedhojë e pasurisë së trashëguar nga gjyshërit.
Ndërkohë që shumë më modeste ka qenë pasuria e Prokurorit të Krimeve të Rënda Dritan Prençi, një prej hetuesve të çështjes Tahiri. Ai zotëron një apartament me sipërfaqe 71 metra katrorë në Kashar me vlerë 31 mijë euro të blerë me kredi. shuma e pashlyer e kësaj kredie, sipas relatores së çështjes është 936 mijë lekë. Po ashtu, ai zotëron edhe 1/8 e dy parcelave bujqësore të përfituara nga familja e tij.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.