Kalojnë “sitën” e Vetting-ut – Konfirmohen Gjyqtarët Hallunaj e Kadi dhe Prokurori Muçi

Tre magjistratë janë konfirmuar në detyrë paraditen e së mërkurës duke kaluar me sukses “sitën” e Vetting-ut. Bëhet fjalë për dy gjyqtarë, Dritan Hallunajn e Krimeve të Rënda dhe Brunilda Kadin e Gjykatës së Tiranës, si dhe prokurorin e Krimeve të Rënda, Besnik Muçi.

Hallunajt ju desh të jepte shpjegime për një apartament me sipërfaqe 165 metra katrorë në Tiranë blerë 49 mije euro përmes një kredie 5 milionë euro dhe kursimeve.  Komisioni vërejti se çmimi për metër katrorë rezulton shumë më i ulët nga ai i tregut, ndërkohë që magjistrati shpjegoi se e kishe blerë me çmim okazion.

Ndërkohë që vendimi i konfirmimit për Gjyqtaren e Tiranës Brunilda Kadi u shoqërua me një klauzolë, e cila detyron organet kompetente disiplinore të shqyrtojnë një vendim të saj ndaj një shtetasi spanjoll. Ky i fundit është ankuar pse i ka shkuar njoftimi në shqip dhe jo në spanjisht.

I treti që është konfirmuar në detyrë gjatë së mërkurës ka qenë prokurori i Krimeve të Rënda, Besnik Muçi. Gjatë seancës dëgjimore atij i është dashur të përgjigjet për mosfillimimin e një hetimi pasuror për një shtetas të hetuar për trafik droge, si dhe pushimin e një procedimi penal për gjobëvënie.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.