Kalon testin e Vetting-ut – Konfirmohet Gjyqtarja e Vlorës, nën akuzë për “Karaburunin”

Komisioni i Pavarur i Kualifikimit ka konfirmuar në detyrë Gjyqtaren Apelit të Vlorës, Brikena Ukperaj. Ajo u vlerësua si e përshtatshme për të vijuar karrierën duke kaluar me sukses tre komponentët e testit: atë të pasurisë, të integritetit personal dhe atë profesional. Komisioni nuk mori parasysh 12 ankesa nga qytetarët në drejtim të saj, duke vlerësuar se bëhej fjalë për çështje të cilat mund të merreshin nga gjykatat e shkallëve më të larta.

Ndërkaq, seanca dëgjimore ndaj saj u shoqërua me një incident katër ditë më parë. Në seancë ishin të pranishëm disa prej pjesëtarëve të familjes Bobo, të cilët pretendojnë se Ukperaj është përfshirë në një aferë korruptive për një sipërfaqe prej 240 hektarësh në Karaburun, pronë e familjes që prej vitit 1922.

Ata akuzuan se Ukperaj e ktheu çështjen për rigjykim për të bërë të mundur që kjo sipërfaqe të përfitohej nga një ministër dhe një deputet i Kuvendit. Ukperaj është ndër emrat që ju nënshtrua me përparësi Vetting-ut pasi është anëtare e Këshillit të Emërimeve në Drejtësi.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.