Kamionët në “sitë”, Gjiknuri: Jo më qarkullim të mbingarkuar, aksion me Policinë e Shtetit

Kamionët e mbingarkuar nuk do të lejohen më të qarkullojnë. Ministria e Infrastrukturës dhe Energjisë do të nisë një aksion në bashkëpunim me Policinë e Shtetit, që do të ketë në fokus pikërisht këto mjete, që konsiderohen si një nga faktorët kryesorë që çojnë në dëmtimin e rrugëve.

“Na lind një detyrë që shumë shpejt do të kthehet në një aksion. Të mos lejojmë më kamionë mbipeshë të cilët janë shkatërruesit e vërtetë të rrugës. Ata e shkatërruan autostradën Tiranë-Durrës, ata mund ta shkatërrojnë edhe këtë rrugë në vitet në vijim më shpejt nëse do lejohen mbingarkesat. Vihet re ky fenomen, kamionë që mbingarkohen me krom apo material të tjera. Shumë shpejt do të fillojmë një aksion me Policinë e Shtetit që të kontrollojnë që mos lejojmë më lëvizjen e tyre në mbipeshë”.

Deklaratat e Gjiknurit u bënë gjatë inspektimit të punimeve që po kryhen për rehabilitimin e aksit rrugor Vorë-Kthesa e Rinasit-Fushë Krujë.

“Po investohen për herë të parë pas shumë vitesh këtu mbi 4 milion euro. Puna po ecën mirë dhe brenda fatit ne do kemi një rrugë thuajse krejtësisht të re. Një aks me rëndësi që lidh autostradën Tiranë-Durrës me pjesën e veriut të vendit. Qeveria po investon konsiderueshëm në mirëmbajtjen e rrugëve krahas hapjes së kantiereve të reja”.

Ndërhyrja në këtë aks kryhet në kuadër të programit të qeverisë shqiptare për mirëmbajtjen me performancë të akseve rrugore dhe parashikon rehabilitimin e plotë të nënshtresave dhe paketë të plotë asfaltike në 11 kilometra rrugë. Investimi prek edhe gjithë sinjalistikën vertikale e horizontale.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.