“Kampioni europian i papunësisë” – Norma drejt 15% në Spanjë. Përfshihet në debatin politik
Norma e papunësisë në Spanjë është rritur në tremujorin e parë, duke vënë në dukje dobësinë e ekonomisë pak ditë përpara zgjedhjeve kombëtare.
Norma u rrit në 14.7% në periudhën Janar- Mars, nga 14.45% që ishte në tre muajt e fundit të vitit 2018, duke shënuar rritjen e parë tremujore që prej fillimit të vitit të kaluar. Papunësia në Spanjë tregon zakonisht rritje në fillim të vitit, pasi përfundon punësimi i përkohshëm për fundin e vitit në sektorin e shërbimeve, që përbën gjysmën e ekonomisë së vendit. Rimëkëmbja e Spanjës nga recesioni po hyn në vitin e 6 dhe çështjet ekonomike nuk do të kenë prioritet në fushatë.
Por norma e papunësisë qëndron e dyta më e lartë në Bashkimin Europian dhe u përfshi në një debat politik mes liderëve të partisë këtë javë. Duke sulmuar socialistin Pedro Sanchez, Kryeministri që po largohet, Albert Rivera i qendrës së djathtë Ciudadanos, e quajti Spanjën “kampionin europian të papunësisë”. Norma e papunësisë në Spanjë është përgjysmuar nga viti 2013, nën drejtimin e Mariano Rajoy dhe ka vazhduar trajektoren rënëse që kur socialisti Sanchez mori detyrën një vit më parë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.