Kampioni i naftës dhe gazit në Kinë përgatit tërheqjen nga Perëndimi. Shkak, frika nga sanksionet!

Prodhuesi kryesor kinez i naftës dhe gazit në det të hapur CNOOC Ltd. (0883.HK) po përgatitet të largohet nga operacionet e tij në Britani, Kanada dhe Shtetet e Bashkuara, për shkak të shqetësimeve në Pekin se asetet mund të bëhen subjekt i sanksioneve perëndimore, thanë burimet e industrisë. Lidhjet midis Kinës dhe Perëndimit janë tensionuar prej kohësh nga çështjet e tregtisë dhe të drejtave të njeriut dhe tensioni është rritur pas pushtimit rus të Ukrainës, të cilin Kina ka refuzuar ta dënojë.

Shtetet e Bashkuara thanë javën e kaluar se Kina mund të përballet me pasoja nëse e ndihmon Rusinë të shmangë sanksionet perëndimore që kanë përfshirë masa financiare që kufizojnë aksesin e Rusisë në valutë të huaj dhe e bëjnë të komplikuar procesin e pagesave ndërkombëtare.

Kompanitë kryejnë periodikisht rishikime të portofoleve të tyre, por dalja që po përgatitej do të ndodhte më pak se një dekadë pasi CNOOC në pronësi shtetërore hyri në të tre vendet përmes një blerjeje prej 15 miliardë dollarësh të Nexen të Kanadasë, një marrëveshje që e transformoi kampionin kinez në një prodhues lider botëror.

Asetet, të cilat përfshijnë aksione në fushat kryesore në Detin e Veriut, Gjirin e Meksikës dhe projektet e mëdha kanadeze të rërës së naftës, prodhojnë rreth 220,000 fuçi ekuivalente nafte në ditë (boed), gjetën llogaritjet e Reuters. Muajin e kaluar, Reuters raportoi se CNOOC kishte punësuar Bankën e Amerikës për t’u përgatitur për shitjen e aseteve të saj në Detin e Veriut, të cilat përfshijnë një aksion në një nga fushat më të mëdha të pellgut.

CNOOC ka nisur një rishikim të portofolit global përpara listimit të tij publik të planifikuar në bursën e Shangait në fund të këtij muaji, që synon kryesisht marrjen e fondeve alternative pas heqjes së aksioneve të saj në SHBA tetorin e kaluar, thanë burimet.

Heqja nga lista ishte pjesë e një lëvizjeje të administratës së ish-presidentit të SHBA Donald Trump në vitin 2020 që synonte disa kompani kineze që Uashingtoni tha se ishin në pronësi ose të kontrolluara nga ushtria kineze. Kina e dënoi këtë veprim.

CNOOC po përfiton gjithashtu nga një rritje e çmimeve të naftës dhe gazit, e nxitur nga pushtimi i Ukrainës nga Rusia më 24 shkurt, dhe shpreson të tërheqë blerës ndërsa vendet perëndimore kërkojnë të zhvillojnë prodhimin vendas për të zëvendësuar energjinë ruse.

Ndërsa kërkon të largohet nga Perëndimi, CNOOC po kërkon të blejë asete të reja në Amerikën Latine dhe Afrikë, dhe gjithashtu dëshiron t’i japë përparësi zhvillimit të perspektivave të mëdha dhe të reja në Brazil, Guajana dhe Ugandë, thanë burimet. RTS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.