“Kantinat Ushqimore” në shkolla, nis projekti nga “Mësonjëtorja e parë shqipe” – Përfitojnë 2000 nxënës
Shkolla 9 vjeçare “Mësonjëtorja e parë shqipe”, do të jetë shkolla e parë shqipe edhe për zbatimin e projektit “Kantinat Ushqimore”, ku nxënësit përveç edukimit do të konsumojnë edhe një vakt ushqimor të kontrolluar dhe me një menu enkas për ta.
Në Ditën Botërore të Ushqimit ministri i Bujqësisë dhe Zhvillimit Rural, Niko Peleshi i shoqëruar nga kryetari i Kryetari i Bashkisë Korçë, Sotiraq Fillo, kanë qenë të pranishëm gjatë orës së konsumimit të ushqimit për nxënësit e shkollës, sipas një menuje të përgatitur enkas për ta.
“Duam që të rritim sigurinë ushqimore në vend duke filluar nga fëmijët. Sepse natyrisht bëhet fjalë për shëndetin e tyre, bëhet fjalë për një të ardhme më të sigurtë nga pikëpamja ushqimore”, tha ministri.
Ministri shprehu vendosmërinë për standarde më të larta sigurie, si dhe largimin e çdo ambulanti nga oborret e shkollave.
“Do t’i ndalojmë, do t’i largojmë të gjithë ambulantët nga oborret e shkolla, nga territoret e shkollës dhe do të hapim brenda shkollave ambiente të pastra me ushqim të kontrolluar. Menuja e kantinës ushqimore është një menu e konfirmuar, e kontrolluar nga Ministria e Shëndetësisë dhe do të ndiqen në zbatim, qoftë me respektimin e kushteve higjeno-sanitare, qoftë për përmbajtjen e ushqimeve që tregtohen në shkolla nga Autoriteti Kombëtar i Ushqimit.”
Projekti i kantinave ushqimore do të shtrihet gjatë javëve të ardhshme dhe në tri shkolla të tjera të këtij qarku, dhe do të vijojë në muajin Nëntor në qytetin e Elbasanit, Tiranës, duke u shtrirë më pas në të gjithë Shqipërinë. Nga ky projekt do të përfitojnë rreth 2000 nxënës të shkollave 9-vjeçare në gjithë territorin e vendit.
Projekti “Kantinat Ushqimore” është pjesë e marrëveshjes “Bëjmë detyrat e shtëpisë dhe ushqehemi shëndetshëm”, nënshkruar midis Ministrisë së Bujqësisë, Shëndetësisë, Arsimit si dhe Bashkive Elbasan, Fier, Korçë, Lezhë, Tiranë.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.