Kapaciteti prodhues – Shfrytëzimi më i lartë në shërbime

Bizneset rritën shkallën e shfrytëzimit të kapaciteteve në tremujorin e parë të këtij viti. Sipas vrojtimit të Bankës së Shqipërisë, edhe në këtë tregues përmirësimet më të mëdha po i shfaq dega e shërbimeve. Në fund të tremujorit të parë, shfrytëzimi i kapaciteteve në shërbime u rrit me 5.2 pikë përqindje dhe arriti në 75.8%.

Shërbimet kanë shkallën më të lartë të shfrytëzimit të kapaciteteve në ekonominë shqiptare dhe ngelen kolona kryesore e rritjes ekonomike. Edhe në tregti norma e shfrytëzimit të kapaciteteve shënoi rritje me 4.0 pikë përqindje gjatë tremujorit të parë, duke arritur në 71.2%. Normë të lartë të shfrytëzimit të kapaciteteve ka edhe sektori i industrisë. Megjithëse pësoi një rënie të lehtë në tremujorin e parë të vitit, edhe ky sektor ngelet sipër mesatares historike dhe për tremujorin e parë të vitit raportonte një shfrytëzim prej 72.3% të potencialeve të veta.

Sektori i ndërtimit ngelet segmenti me shkallën më të ulët të shfrytëzimit të kapaciteteve në ekonomi, me rreth 63%. Megjithatë, edhe ky sektor shënoi përmirësime në tremujorin e parë të vitit, duke e rritur këtë tregues me 3.7% krahasuar me tremujorin e mëparshëm.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.