Kapet sërish në “faj” kasapi – AKU bllokon 75 kg mish në thertoren e tij të paligjshme
Autoriteti Kombëtar i Ushqimit ka bllokuar rreth 75 kg mish në një thertore të paligjshme në qytetin e Tiranës, aktiviteti i së cilës në pronësi të shtetasit K.M, ushtrohej në katin e parë të banesës së tij i paregjistruar në organet tatimore.
Gjatë kontrollit shtetasit iu gjetën 58.2 kg mish viçi dhe dy karkasa qengji në sasinë e 17 kg, të cilat nga shtetasi në momentin e inspektimit, është tentuar të fshihen duke u hedhur jashtë mureve të “thertores” së paligjshme në banesës. Kjo nuk ishte shkelja e parë për shtetasin K.M. Në një hark kohor të një muaji, AKU e ka kapur duke transportuar mish në kushte të papërshtatshme në datën 21 janar të këtij viti.
Për shkeljet e lartpërmendura, nga trupa inspektuese u mor masa bllokim i menjëhershëm i aktivitetit, u konfiskua sasia e produktit të pasigurtë (mish) dhe mjeteve të punës për kryerjen e shkeljes (çengela, parandë dhe trungu) dhe materialet po vlerësohen edhe për përgatitjen e kallëzimit penal për veprën penale të parashikuar nga neni 288 “Prodhimi dhe shitja e ushqimeve dhe e lëndëve të tjera të rrezikshme për shëndetin“. Aksioni i AKU u mbështet edhe nga policia.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.