Karantina, ashpërsohen dënimet. Zbardhet drafti: Deri 15 vite burg nëse shkakton vdekjen e një personi, 10 vite nëse infekton dikë
Zbutja e paralajmëruar e masave shtrënguese për qytetarët dhe bizneset për shkak të Pandemisë Covid 19 do të shoqërohet me ashpërsim të fortë të gjobave e dënimeve për të gjithë ata që shkelin rregullat e karantinimit apo aktivitetit të bizeseve. Janë zbardhur tashmë ndryshimet e propozuara në Kodin Penal të cilat pashikojnë dënime deri me 15 vite heqje lirie për këto që duke shkelur karantinën shkakton vdekjen e qoftë edhe një personi, ndërkohë që nëse thjesht e transmeton virusin rrezikon deri 10 vite burgim.
Sipas draftit të propozuar nga Mazhoranca, mosbindja ndaj rregullave të dënohet me gjobë dhe me burgim deri në gjashtë muaj. Ndërkohë që nëse mosbindja përsëritet, dënimi shkon nga 30 ditë deri në 1 vit burg. Ndërkaq parashikohet deri në 5 vite burg për ato biznese që thyejnë urdhrat.
“Mosbindja ndaj rregullave, vendimeve dhe urdhrave të nxjerra nga organet kompetente shtetërore për masat e marra gjatë gjendjes së jashtëzakonshme apo gjendjes së fatkeqësisë natyrore, përbën kundërvajtje penale dhe dënohet me gjobë ose me burgim deri në gjashtë muaj.
Po kjo vepër, e kryer në mënyrë të përsëritur dënohet me burgim nga tridhjetë ditë deri në një vit. Kur nga vepra është shkaktuar rrezikimi i jetës ose vdekja e personit, dënohet me burgim nga një deri në pesë vjet” përcaktohet në draft.
Nëse thyen karantinën policia nuk mjaftohet vetëm gjobë por mund të dënohesh edhe deri 10 vite burg. Ndërkaq nëse thyen karantinën e infekton të tjerë, parashikohet 3 deri në 10 vite burg. Kur nga vepra ka ardhur ose ka mundësi të vijë vdekja e personit, dënohet me burgim nga pesë deri në pesëmbëdhjetë vjet.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.