Karantina ka ndikim serioz në shëndetin mendor – Ja si mund të ndihmoni veten dhe të tjerët
Karantina mjekësore dhe izolimi në përgjithësi, shoqërohen me efekte serioze të shëndetit mendor. Në një studim të botuar në The Lancet, u zbulua se karantina është e lidhur me simptomat e çrregullimit të stresit post-traumatik (PTSD), konfuzionin dhe zemërimin, me disa hulumtime që sugjerojnë se këto efekte janë afatgjata. Duke pasur parasysh se kriza e koronavirusit ka të ngjarë të jetë me ne për ca kohë, implikimet e shëndetit mendor nuk mund të nënvlerësohen.
Pavarësisht nëse në karantinë apo jo, ankthet vetëm përkeqësohen nga konfuzioni dhe gjykimi shoqëror ndërsa njerëzit përpiqen të kuptojnë përgjigjen e duhur.
Informacioni i qartë nga burimet qeveritare është një pjesë e dobishme e procesit. Profesorja e psikiatrisë Rima Styra dhe kolegia e saj i Universitetit të Torontos, Laura Hawryluck, një profesore e mjekësisë së kujdesit kritik, hulumtuan karantinat gjatë shpërthimit të SARS dhe zbuluan se 29% e atyre të karantinuar shfaqnin shenja të PTSD, dhe 31% kishin simptoma depresioni pas izolimit.
Shëndetësia publike dhe shërbimet qeveritare duhet të japin informacion të detajuar në lidhje me simptomat e koronavirusit, kursin tipik të tij, sa janë duke u kujdesur në spitale, dhe për sa kohë, sugjerojnë Styra dhe Hawryluck.
Çfarë të bëni kur jeni vetëm
Pavarësisht konfuzionit se si dhe kur të karantinohen, miliona njerëz në mbarë botën në mënyrë të pashmangshme do të duhet të zvogëlojnë në mënyrë drastike kontaktin shoqëror dhe të kalojnë kohën në izolim për të luftuar koronavirusin. Frank McAndrew, një psikolog evolucionar në Kolegjin Knox në Illinois, vëren se karantina e detyruar është veçanërisht shqetësuese. “Të qenit në karantinë i jep njeriut djesinë e të qennurit në mëshirën e njerëzve të tjerë dhe forcave të tjera të pakontrollueshme siç është epidemia. Kjo çon në një ndjenjë të pafuqishmërisë dhe pasigurisë për të ardhmen që mund të jetë shumë shqetësuese,” thotë ai. Aktivitete që krijojnë një ndjenjë ndryshimi dhe qëllimi, të tilla si rregullimi i mobiljeve ose pastrimi i shtëpisë, mund të ndihmojnë në krijimin e stimulimit.
Projektet krijuese si vizatimi, përpilimi i fotografive ose sudoku mund të ndihmojnë ta mbani mendjen aktive gjithashtu.
Për ata që nuk janë në një izolim të detyruar, mundësia për të ndihmuar të tjerët mund të ndikojë dhe në krijimin e një sensi bashkësie ose komuniteti. Vetmia është një rrezik serioz shëndetësor për njerëzit e moshuar që janë të prekshëm nga koronavirusi dhe janë të detyruar të shmangin kontaktin shoqëror. Implikimet e shëndetit mendor prej izolimit nuk do të thotë se nuk duhet të bëjmë karantinë. Është thelbësore të ndiqni udhëzimet e profesionistëve mjekësorë në luftimin e koronavirusit, ashtu siç është e rëndësishme të njiheni me vështirësitë. Në kohë izolimi, ne mund të mbështesim njëri-tjetrin duke njohur betejat e shëndetit mendor dhe duke siguruar rehati e konfort edhe nga larg. (QUARTZ)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.