Kartat e Shëndetit për fëmijët, procedura si mund të aplikojnë online kryefamiljarët. Dokumentet që duhen dorëzuar
Kryefamiljarët mund t’i pajisin fëmijët e tyre me Kartë Shëndeti për shërbime shëndetësore, duke aplikuar në portalin E-Albania. Kështu, portali qeveritar ofron mundësinë e aplikimit nga Kryefamiljari për kartën e shëndetit për fëmijët 0-18 vjeç, që janë regjistruar paraprakisht pranë mjekut të familjes. Aplikimi është falas dhe ai ofrohet edhe për shtetasit e huaj rezidentë në Shqipëri.
Karta e Shëndetit është dokument personal, i patjetërsueshëm që vërteton se mbajtësi i saj është person i siguruar dhe përfiton shërbimet shëndetësore pa pagesë. Ky shërbim elektronik ju mundëson të aplikoni online për të pajisur me kartë shëndeti fëmijën. Përpara se të aplikoni, ju lutemi duhet të keni regjistruar fëmijën tuaj pranë mjekut të familjes.
Nëpërmjet këtij shërbimi, kryefamiljarët mund të aplikojnë online për fëmijët nga 0-18 vjeç për t’i pajisur me Kartë Shëndeti.
Bazuar në vendimin e Qeverisë, nr.307, datë 21.05.2014 për “Regjistrimin dhe Identifikimin e Personave të Siguruar nga Sigurimi i Detyrueshëm Shëndetësor”, identifikimi i personave të siguruar në skemën e Sigurimit të Detyrueshëm të Kujdesit Shëndetësor, bëhet me anë të Kartës së Shëndetit. Karta e Shëndetit është dokumenti që vërteton se mbajtësi i saj është person i siguruar dhe përfiton shërbimet shëndetësore pa pagesë. Karta është personale, e patjetërsueshme dhe shpërndahet pa asnjë pagesë apo tarifë shërbimi.
Ky shërbim ofrohet menjëherë online për kategoritë e mëposhtme:
-Nga 0-1 vjeç
-Nga 1-18 vjeç
Dokumentacioni i nevojshëm
Kujdes: Përpara se të aplikoni, ju lutemi duhet të keni regjistruar fëmijën tuaj pranë mjekut të familjes.
Për të kryer aplikimin online për Kartën e Shëndetit nevojitet:
-Dokumenti i identifikimit të përdoruesit: Kartë Identiteti ose pasaportë biometrike (i nevojshëm për t’u loguar në portalin e-Albania).
Dokumentet që duhet të paraqiten pranë qendrës shëndetësore, pasi është kryer aplikimi online për Kartë Shëndeti:
-Dokumentacion identifikues:
-Për shtetasit shqiptarë: Kartën e Identitetit; për fëmijët deri në moshën 16 vjeç, në mungesë të Kartës së Identitetit, paraqitet certifikata e gjendjes civile ose pasaporta, te cilat janë dokumente që përmbajnë numrin personal të identitetit.
-Për shtetasit e huaj: Leja e qëndrimit ose leja provizore e qëndrimit e lëshuar nga autoriteti vendor për kufirin dhe migracionin.
-Dokumentacionin që vërteton kategorinë përfituese dhe afatin e përfitimit.
Hapat e procedurës
Kujdes: Përpara se të aplikoni, ju lutem duhet të keni regjistruar fëmijën tuaj pranë mjekut të familjes.
Për të përdorur shërbimin regjistrohuni si qytetar në portal dhe plotësoni formën përkatëse për këtë kërkesë, e cila hapet menjëherë kur klikoni butonin “Përdor” në krah të këtij shërbimi.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.