Katër milionerë në kabinetin e ri qeveritar të Spanjës
Qeveria e re socialiste në Spanjë ka në përbërje të saj katër milionerë, të udhëhequr nga ministri i Jashtëm Josep Borrell. Kjo është bërë e njohur nga vetë publikimet e pasurisë për 1 mijë zyrtarë të lartë, një përpjekje për të rritur transparencën e qeverisë së drejtuar nga kryeministri Pedro Sanchez.
Ministri i Jashtëm 71-vjeçar Borrell deklaroi një pasuri prej 2.77 milionë eurosh, ndjekur nga ministrja e Arsimit Maria Isabel Celaa 69 vjeç me një pasuri prej 1.63 milionë eurosh. Pas tyre ndjekin ministri i Shkencave, 55-vjeçari ish astronaut Pedro Duque me 1.52 milionë euro, si dhe ministri i Kulturës dhe Sportit, Jose Guirao me 1.07 milionë euro.
Kryeministri Sanchez mori drejtimin e qeverisë, pas një votëbesimi në parlament në Qershor. Disa anëtarë të kabinetit të tij janë vendosur nën presion për të dhënë llogari mbi pasuritë e tyre. Duque u detyrua të shpjegojë se pse kishte vendour dy shtëpitë e tij në emër të një kompanie. Ndërsa ish-Ministri i Kulturës Maxim Huerta dha dorëheqjen në qershor pas akuzave për evazion fiskal.
Ndërkohë, deklaratat e pasurisë treguan se kryeministri Sanchez ka një pasuri prej 343 mijë eurosh dhe 192 mijë euro detyrime. Ndërsa ish kryeministri Mariano Rajoy ishte një milioner, me një pasuri prej 1.54 milionë eurosh.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.