Kavalec do të zëvendësojë Lu – Emërimi i ambasadores, pas miratimit në senatin amerikan
Kathleen Ann Kavalec është ambasadorja e re në Shqipëri, e cila pas votimit në senat pritet të zëvendësojë diplomatin në detyrë, Donald Lu. Presidenti i Shteteve të Bashkuara të Amerikës, Donald Tramp, ka propozuar Kavalec, e cila ka një karrierë 30-vjeçare si diplomate. Ambasadorja e re, aktualisht mban postin e zv/ndihmës sekretares në zyrën e çështjeve europiane dhe euroaziatike në Departamentin e Shtetit e emëruar që prej vitit 2015. Po kush është Kathleen Ann Kavalec? Ajo ka shërbyer më parë si drejtoreshë e zyrës së çështjeve të Rusisë.
Në vitet 2010 deri në 2013, Kavalec ka shërbyer si zv/shefe e misionit dhe zv/delegate e përhershme në misionin e SHBA-ve në UNESCO në Paris. Në vitet 2009-2010, diplomatja e re ishte zv/koordinatore për asistencën e SHBA-ve për Evropën, Euroazinë dhe Azinë Qendrore, ndërsa në vitet 2008 deri në 2009, Kavalec ka shërbyer si drejtoreshë e parandalimit të konflikteve në zyrën e koordinimit për rindërtim dhe stabilizim.
Sipas CV-së të bërë publike, ambasadorja rezulton se njeh 6 gjuhë, por jo shqipen. Ndërkohë, ambasadori ende në detyrë, Donald Lu, ka përfunduar mandatin e tij që në muajin janar të këtij viti, por pavarësisht kësaj, Lu kërkoi zgjatjen e qëndrimit për shkak të angazhimit në procesin e reformës në drejtësi.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.