KE bën zhvlerësimin e radhës – Ekonomia shqiptare në ngadalësim këtë vit, kërcënohet nga tensionet politike
Komisioni Europian është institucioni i fundit në radhën e atyre që gjatë ditëve, javëve dhe muajit të fundit kanë zhvlerësuar ekonominë shqiptare. Këtë gjë e kanë bërë me radhë: Banka Botërore, Fondi Monetar Ndërkombëtar, Instituti i Vienës për Studime Ekonomike, dhe Banka Europiane për Rindërtim dhe Zhvillim vetëm një ditë më parë.
Në raportin më të fundit për ekonomitë e Bashkimit Europian dhe vendeve kandidate, Komisioni Europian analizon gjerësisht edhe performancën e ekonomisë shqiptare, pritshmëritë për të ardhmen dhe rreziqet kryesore që i kanosen.
Kështu, krahu ekzekutiv i Bashkimit Europian ka shkurtuar në 3.1% projeksionet për rritjen ekonomike të vendit tonë gjatë këtij viti, nga 3.8% që projektonte në projeksionet e pranverës.
Ky shkurtim i projeksioneve vjen kryesisht si rrjedhojë e faktorëve që lidhen me motin dhe prodhimin energjetik, sqaron Komisioni Europian në këtë raport.
Sa i përket vitit të ardhshëm dhe 2021-shit, ku flet për 3.7% dhe 3.6% rritje, nënvizohet fakti se rimëkëmbja do të vijë si pasojë e kërkesës së lartë së brendshme, kryesisht nga sektori familjar.
Ky sektor parashikohet të marrë shtysë nga rritja e pagave dhe e punësimit, thuhet më tej. Por, nga ana tjetër, rreziqet janë aty dhe lidhen kryesisht me faktorët e jashtëm, por edhe klimës politike të brendshme të tensionuar. Faktorët e jashtëm i referohen kryesisht përkeqësimit të performancës së partnerëve kryesorë, sidomos në eurozonë, me Italinë në krye të shqetësimeve tona.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.